Braho: Metodat janë sofistikuar, krimi i organizuar gjithnjë e më kompleks

Kreu i SPAK, Klodian Braho, deklaroi se krimi i organizuar po bëhet gjithnjë e më kompleks për shkak të sofistikimit të metodave të veprimit, përhapjes ndërkombëtare dhe përdorimit të formave të reja të pastrimit të parave.

Gjatë raportimit në Komisionin e Ligjeve, ai vlerësoi bashkëpunimin me Policinë e Shtetit, duke theksuar se referimet penale janë rritur gjatë vitit 2025.

“Komplekse janë çështjet e krimit të organizuar dhe komplekse e bëjnë format e reja të parave, përhapja gjeografike, ndërkombëtarizimi, sofistikimi dhe jo vetëm. Ka forma të reja të organizimit dhe infrastrukturave që kanë në përdorim. Ka pastrim parash edhe në vende offshore.

Gjatë 2025-ës referimet penale të Policisë së Shtetit janë rritur në SPAK në një masë të caktuar. Kemi vlerësimin më të madh për Policinë e Shtetit dhe sigurisht jo të gjithë janë njësoj dhe ndonjëri mund të ketë edhe probleme me ligjin, të paktën ne dyshojmë”, tha Braho.