Bratu flet para Vllaznisë: Dua një Partizan agresiv! Jemi klub i madh, pritet shumë nga ne

Partizani ndeshet nesër me Vllazninë për javën e tretë të kampionatit. Sfida që do të luhet në stadiumin “Loro Boriçi” do të transmetohet drejtpërdrejt në RTSH. Përpara kësaj ndeshjeje ka folur trajneri Florin Bratu, i cili ende nuk ka marrë fitoren e parë në krye të Partizanit.

Trajneri rumun e konsideron ndeshjen në Shkodër shumë të rëndësishme dhe shpreson të marrë pikë. Ai ka pohuar se të gjithë lojtarët janë gati për këtë transfertë.

Partizani në dy ndeshje ka vetëm një pikë. Sa e rëndësishme është përballja ndaj Vllaznisë?

Po është e vërtetë kemi vetëm një pikë, nuk është nisja që dëshironim. Gjithashtu është një moment i rëndësishëm ndeshja me Vllazninë dhe sigurisht duhet të marrim pikë. Do të përballemi me një skuadër shumë të mirë, e cila gjithashtu luan mjaft mirë në shtëpi. Duhet të jemi gati dhe të fokusuar për këtë ndeshje.

Çfarë keni kërkuar nga skuadra gjatë kësaj jave?

Të mbajmë ritmin tonë në seancat stërvitore kjo është e rëndësishme. Të jemi agresiv, por të jemi agresiv pa u ndëshkuar me kartonë të kuq. Realisht kemi luajtur dy ndeshje për shumë minuta me një lojtarë më pak dhe nuk jam aspak i kënaqur me këtë fakt.

Partizani ka shënuar vetëm një gol në dy ndeshje…

Eshtë e vërtetë, por nuk është ky realiteti, sepse kemi luajtur për afro 60 minuta me njël ojtar më pak ndaj Teutës. E njëjta situatë ka ndodhur edhe me Laçin dhe për mua ka qenë një situatë konfuze, pasi gjithë planet e skuadrës ndryshuan. Por do të na duhet të improvizojmë të gjejmë zgjidhje për sa i përket fazës sulmuese.

Shanset të shohim Tomën dhe Sidibe të luajnë së bashku dhe a është gati Fadairo?

Të gjithë ata janë të gatshëm për ne, janë pjesë e grupit. Ende nuk e kam vendosur 100% formacionin. Do të më duhet të shoh edhe seancën e fundit stërvitore që për nesër të bëj edhe zgjedhet e duhura, por për mendimin tim ata janë të gjithë të gatshëm për nesër.

A është ky momenti më i mirë për t’u përballur me Vllazninë pas episdeve që ndodhën në Elbasan?

Nuk kemi folur me lojtarët rreth çfarë ka ndodhur në Elbasan. Ato episode janë parë nga të gjithë por mendoj që nuk është puna jonë. Ne duhet të jemi të fokusuar në te ndeshja, të luajmë atje. E dimë që do të jetë një trasfertë e vështirë për ne, por lojtarët e mi janë gati të japin gjithçka dhe të marrim pikët sepse për ne janë shumë të rëndësishme. Jemi një klub i madh dhe prej nesh presin shumë.

Fitorja e fundit e Partizanit në “Loro Boriçi” ndaj Vllazninë daton në 2022…

Mendoj se është një kapitull i ri, një kampionat i ri. Shpresoj që të japim maksimumin. Gjithashtu edhe për Vllazninë do të jetë një presion i madh pas ndeshjes me Elbasanin. Për këtë fakt do të na duhet ta menaxhojmë sa më mirë këtë situatë.

Sa i rëndësishëm është rikthimi i Human për këtë sfidë?

Sigurisht është një prej lojtarëve tanë më të rëndësishëm. Dhe për këtë javë sigurisht kemi fituar një lojtar.