Merret vendimi për Chris Brown, ja çfarë vendosi gjykata pas sulmit ndaj producentit

Këngëtari Chris Brown i ka shpëtuar burgut, pasi gjykata në Londër e dënoi me tetë muaj burg me kusht për sulmin ndaj producentit muzikor Abraham Diaw në një klub nate në vitin 2023.

Vendimi u dha të hënën, më 26 tetor, në Gjykatën Southwark Crown Court, në Londër. Brown, 37 vjeç, do ta vuajë dënimin vetëm nëse shkel kushtet e përcaktuara gjatë periudhës 12-mujore të pezullimit.

Ngjarja ndodhi më 19 shkurt 2023, në klubin e natës Tape, në zonën Mayfair të Londrës. Sipas prokurorisë, këngëtari goditi producentin muzikor në kokë me një shishe tequila, ndërsa bashkëpandehuri i tij, Omololu Akinlolu, i njohur si HoodyBaby, e goditi gjithashtu.

Pamjet e kamerave të sigurisë të paraqitura në gjykatë treguan Brown duke goditur Diaw me shishe, përpara se përplasja të përshkallëzohej. Viktima mori trajtim mjekësor për dëmtime në kokë dhe në gju.

Gjatë seancës, gjykatësi Tony Baumgartner e cilësoi sulmin si një akt të rrezikshëm dhune, duke theksuar se përdorimi i përsëritur i një shisheje qelqi për të goditur dikë në kokë mund të kishte shkaktuar dëmtime shumë më të rënda.

Ai nënvizoi gjithashtu se fama, suksesi komercial dhe karriera e gjatë muzikore nuk i japin askujt të drejtën për trajtim të veçantë përpara ligjit.

Brown u deklarua fajtor për veprën penale të përleshjes së dhunshme në korrik të vitit 2026. Në kuadër të marrëveshjes për pranimin e fajësisë, akuzat më të rënda ndaj tij, përfshirë atë për shkaktim të dëmtimeve të rënda trupore dhe posedim të një arme të paligjshme, u hoqën.

Edhe Omololu Akinlolu, 40 vjeç, u dënua me katër muaj burg me kusht për një periudhë prej 12 muajsh, pasi u deklarua fajtor për të njëjtën vepër penale.

Rasti ka rikthyer në vëmendje problemet e përsëritura ligjore të Chris Brown, i cili në vitin 2009 u deklarua fajtor për sulmin ndaj asokohe partneres së tij, këngëtares Rihanna.