Brera shkruan histori në Ligën e Kampionëve për të rinj: 8-0 ndaj Santa Kolomës, në raundin tjetër e pret Hofenhajmi

Ekipi i të rinjve të AP Brera nga Strumica ka shkruar histori në futbollin maqedonas, duke kaluar për herë të parë një raund kualifikues në Ligën e Kampionëve për të rinj. Siç njofton MIA, strumicasit e mundën Santa Kolomën e Andorrës me 8-0 në ndeshjen e kthimit të raundit të parë kualifikues, të luajtur në Strumicë.

Brera e kishte fituar edhe ndeshjen e parë me 3-0, por, sipas raportimit të Sportmanija-s, skuadra e trajnerit Gjorgje Stojçev nuk u kënaq me epërsinë dhe e mbylli pjesën e parë me 5-0. Rezultatin e hapi Sejmenov në minutën e 11-të, Shiriq dyfishoi tetë minuta më vonë, ndërsa deri në pushim shënuan edhe Vasilev, sërish Shiriq dhe Ristov.

Në pjesën e dytë, siç njofton MIA, Shiriq e kompletoi het-trikun, ndërsa rezultatin përfundimtar 8-0 e vulosën Trenov dhe Kuleski. Me rezultat të përgjithshëm 11-0 në dy ndeshjet, Brera siguroi plasmanin në raundin tjetër të garës.

Sipas raportimeve të mediave sportive maqedonase, ky është suksesi më i madh i një klubi maqedonas në këtë garë: asnjë përfaqësues i vendit nuk kishte kaluar më parë një raund kualifikues në Ligën e Kampionëve për të rinj.

Në raundin tjetër, të rinjtë e Brerës i pret një provë shumë më e vështirë — dygarëshi me Hofenhajmin e Gjermanisë, ku strumicasit do të kërkojnë ta vazhdojnë përrallën europiane.