MADRID – Socialistët thellojnë epërsinë në sondazhin kombëtar, çështja e banimit dominon debatin

MADRID, 14 tetor /ATSH -AA/ – Socialistët në pushtet në Spanjë kanë thelluar epërsinë ndaj opozitës konservatore, sipas një sondazhi shtetëror të publikuar të mërkurën, në kontrast me sondazhet e tjera që favorizojnë të djathtën përpara zgjedhjeve të parakohshme, në të cilat kriza e banesave është çështja kryesore.

Qendra për Kërkime Sociologjike (CIS) e vlerësoi partinë e kryeministrit Pedro Sanchez me 34 për qind, gati 12 pikë përqindjeje përpara Partisë Popullore (PP), krahasuar me epërsinë prej 5,5 pikësh muajin e kaluar.

Socialistët kanë fituar tre pikë, ndërsa PP-ja ka rënë në 22,2 për qind. Partia e ekstremit të djathtë Vox ka mbetur e treta me 17,1 për qind, e ndjekur nga Sumar, partnerja e koalicionit të socialistëve, me 6,1 për qind dhe partia e majtë Podemos me 3,1 për qind.

Së bashku, tri partitë e majta do të merrnin rreth 43 për qind të votave, afërsisht katër pikë më shumë se PP-ja dhe Vox-i të marra së bashku.

Sondazhi vjen në një kohë të zemërimit publik pas dëbimit nga banesa të Maricarmen Abascal, një grua 87-vjeçare, e cila u detyrua të largohej nga shtëpia që e kishte marrë me qira për shtatë dekada dhe vdiq dy javë më vonë.

Rasti i saj nxiti protesta dhe ngritjen e kampeve të protestuesve në Madrid dhe qytete të tjera, duke shtuar kërkesat për masa kundër kostove të larta të banimit dhe dëbimeve nga banesat.

Sanchez shpalli zgjedhjet për 29 nëntor, pasi parlamenti hodhi poshtë dy dekrete të qeverisë për strehimin.

Sindikatat më të mëdha të Spanjës, CCOO dhe UGT, kanë bërë gjithashtu thirrje për një grevë të përgjithshme më 11 nëntor, për të kërkuar paga më të mira dhe banesa të përballueshme, dy ditë përpara nisjes zyrtare të fushatës zgjedhore.

Sondazhi i së mërkurës ka vënë në pah shkallën e shqetësimit, pasi një rekord prej 55,7 për qind e të anketuarve e kanë renditur strehimin ndër problemet kryesore të Spanjës, shumë përpara imigracionit dhe ekonomisë.

– Mospërputhje në sondazhe

Megjithatë, rezultatet e CIS-it janë në kontrast të theksuar me sondazhet e tjera, të cilat sugjerojnë se konservatorët dhe e djathta ekstreme mund të fitojnë mjaftueshëm vende për të qeverisur së bashku.

Një sondazh i kompanisë 40db për gazetën El Pais dhe radion Cadena SER, i realizuar pas shpalljes së zgjedhjeve, i jepte PP-së dhe Vox-it një epërsi të përbashkët prej rreth 15 pikësh ndaj socialistëve, Sumar-it dhe Podemos-it.

Edhe mesatarja e sondazheve e transmetuesit publik RTVE parashikonte një shumicë të rehatshme parlamentare për PP-në dhe Vox-in, me gjithsej 202 vende në dhomën e ulët të parlamentit, e cila ka 350 vende.

Kjo mospërputhje nuk është e re. Një analizë e gazetës El Pais për 44 zgjedhje që nga viti 2018 zbuloi se sondazhet e CIS-it e kishin mbivlerësuar mbështetjen për të majtën në 43 prej tyre.

Sondazhi i fundit i CIS-it përpara zgjedhjeve të përgjithshme të vitit 2023 iu afrua përqindjes reale të votave të socialistëve, por parashikoi gabimisht se ata do të renditeshin përpara PP-së.

Sondazhi më i fundit i CIS-it u bazua në 5.025 intervista të realizuara në fillim të tetorit.