Britania dorëzohet para BE-së për faturën e “Brexit”
Mbretëria e Bashkuar ka rënë dakord që të respektojë plotësisht angazhimet e saj financiare ndaj Bashkimit Europian, deri në 100 miliardë euro, si pjesë e marrëveshjes me Brukselin për faturën e divorcit të “Brexit”.
Artikulli i “Financial Times” duket se konfirmon atë që raportoi më herët gazeta britanike “Daily Telegraph”, e cila tha se Londra dhe Brukseli kanë rënë dakord që fatura e divorcit të jetë mes 45 dhe 55 miliardë eurove.
Gazeta shkruan gjithashtu se është arritur një marrëveshje në parim, për kërkesën e BE-së për një dëmshpërblim financiar prej 60 miliardë eurosh.
“Reuters” shkruan se Komisioni Europian refuzoi që të komentojë për raportimin e “Financial Times”, heshtje që pasqyrohet edhe në Londër. Analistët thonë se dorëzimi britanik para qëndrimit të ashpër të BE-së ishte i pritshëm, por tashmë duhet parë sesi kryeministrja Theresa May do ta justifikojë faturën para Parlamentit dhe opinionit në Britani.
“Brexit” është shndërruar në një problem shumë të madh për kryeministren britanike dhe ka përçarë fort qeverinë, ndërsa qartësisht shihet se premtimet para referendumit për një largim pa kushte nga BE-ja nuk ishin aspak afër të vërtetës.
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.