Britania hap ankandin e ri për energjinë e rinovueshme, synon dekarbonizimin e sektorit elektrik deri në vitin 2030
Qeveria britanike njoftoi të enjten ankandin e saj më të ri për energjinë e rinovueshme, duke kërkuar oferta nga zhvilluesit e projekteve të energjisë së pastër, si pjesë e përpjekjes për të dekarbonizuar sektorin elektrik deri në vitin 2030 dhe për të ulur faturat e konsumatorëve, siç njofton Reuters.
Sipas qeverisë, energjia e pastër e prodhuar brenda vendit do t’i ulë faturat në afat të gjatë. Ankandi synon të sigurojë zhvillime të reja të energjisë së erës dhe asaj diellore, ndërsa Britania mban rregullisht ankande të tilla për të caktuar buxhetin e projekteve.
Njoftimi vjen në një kohë presioni mbi familjet britanike: tavani tremujor i çmimeve të energjisë për përdorim shtëpiak pritet të rritet me rreth 26 për qind në janar, thanë të mërkurën analistët e Cornwall Insight, ndërsa lufta e SHBA-së dhe Izraelit kundër Iranit i mban të larta çmimet e energjisë në tregjet me shumicë.
Këtë herë qeveria tha se buxhetin përfundimtar do ta caktojë pasi të jenë dorëzuar të gjitha ofertat, një ndryshim nga praktika e mëparshme, kur buxheti përcaktohej paraprakisht. Sipas saj, gjatë dy viteve të fundit ankandet kanë siguruar energji elektrike të pastër të mjaftueshme për të furnizuar më shumë se 20 milionë shtëpi.
Interesi i investitorëve për erën në det mbetet i lartë: në fillim të nëntorit, kompania gjermane RWE dhe fondi amerikan i kapitalit privat KKR ranë dakord të investojnë rreth 12 miliardë paund në projekte të energjisë së erës në det të hapur në Britani.



Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.