Në debutimin në Nasdaq, shefi i Anthropic zotohet: inteligjenca artificiale do të mbetet nën kontrollin e njeriut
Në fjalimin para ziles së hapjes në Nasdaq, në ditën e ofertës publike më të madhe në histori, Dario Amodei tha se Anthropic nuk do t'i nënshtrohet presioneve të biznesit apo të politikës dhe do ta ngadalësojë zhvillimin e modeleve aq sa të duhet për sigurinë e tyre.
Anthropic debutoi të enjten në Wall Street në ofertën publike fillestare (IPO) më të madhe në histori, dhe drejtori i saj ekzekutiv, Dario Amodei, e shfrytëzoi momentin për një zotim publik: kompania nuk do të përkulet as përballë presioneve të biznesit e as atyre politike, dhe sistemet e saj të inteligjencës artificiale do të “mbeten nën kontrollin e njeriut”, siç raporton TechCrunch.
Në fjalimin e mbajtur përpara ziles së hapjes në Nasdaq, Amodei tha se kompania “do ta masë me kujdes ritmin e trajnimit dhe të vendosjes në përdorim të sistemeve të AI, duke marrë aq kohë sa nevojitet për të pasur besim se ato janë të sigurta dhe do të mbeten nën kontrollin e njeriut”.
Amodei e nisi fjalimin me një histori personale: ai bashkëthemeloi Anthropic-un pasi i ati vdiq nga një sëmundje që vetëm pak vite më vonë u bë e shërueshme. Sipas tij, inteligjenca artificiale, në bashkëpunim me njerëzit, mund ta ngjeshë një shekull përparimi shkencor e mjekësor në një dekadë.
Ai paralajmëroi megjithatë për rreziqe “shumë reale”: keqpërdorimin e AI-së nga individë apo shtete, tronditjen ekonomike dhe humbjen e kontrollit mbi sistemet. Këto rreziqe, sipas tij, mund të shmangen me masa mbrojtëse, testime të kujdesshme dhe punë për harmonizimin e modeleve me vlerat njerëzore.
Motra e tij, bashkëthemeluesja Daniela Amodei, i tha CNBC-së të enjten se rreziqet janë reale, por edhe premtimi i inteligjencës artificiale është “i pabesueshëm”. Në shtator, Amodei kishte paraqitur një plan për ritmimin e zhvillimit të AI-së, të cilit iu bashkuan publikisht Sam Altman i OpenAI-t, Demis Hassabis i Google DeepMind dhe Elon Musk i xAI-t, ndonëse deri tani janë bërë pak angazhime konkrete.



Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.