BRUKSEL – BE diskuton forcimin e mbrojtjes ajrore të Ukrainës

BRUKSEL, 1 shtator /ATSH-DPA/- Ministrat e Mbrojtjes të Bashkimit Evropian diskutuan sot vështirësitë për t’i siguruar Ukrainës, pajisje të mjaftueshme të mbrojtjes ajrore, pasi Rusia ka intensifikuar sulmet ndaj vendit.

Përfaqësuesja e Lartë e BE-së për Politikën e Jashtme, Kaja Kallas, tha se korriku dhe gushti kanë qenë muajt më vdekjeprurës për civilët ukrainas.

Sipas saj, Rusia po përshkallëzon sulmet me synimin për të goditur dhe dobësuar sa më shumë popullsinë.

“Problemi kryesor është mbrojtja ajrore. Ukrainës i mungojnë raketat interceptuese”, deklaroi Kallas.

Ministrat nuk morën vendim konkret për t’i dhënë Ukrainës më shumë raketa interceptuese “Patriot”, të prodhuara në SHBA.

Megjithatë, vendet anëtare do të rishikojnë rezervat e tyre, përfshirë edhe raketat më të vjetra, për të parë se çfarë mund të dërgohet në Ukrainë.

Ministri gjerman i Shtetit për Mbrojtjen, Sebastian Hartmann, dënoi sulmet ruse ndaj civilëve, duke i cilësuar ato të papranueshme.

Në takim u diskutuan gjithashtu zbatimi i paketës së ndihmës prej 90 miliardë eurosh për Ukrainën, mbështetja e mëtejshme për ushtrinë ukrainase dhe bashkëpunimi më i ngushtë mes industrive të mbrojtjes të Ukrainës dhe BE-së.

Ministrat diskutuan edhe rëndësinë në rritje të hapësirës në mbrojtjen moderne, si dhe situatën në Lindjen e Mesme, veçanërisht në Liban dhe sigurinë detare. /