BRUKSEL – BE kërkon monitorimin e energjisë dhe ujit nga qendrat e të dhënave

– Komisioni Evropian propozoi sot rregulla të reja që do t’u kërkojnë qendrave të të dhënave në Evropë të deklarojnë se sa me efikasitet përdorin energjinë dhe ujin, sipas Reuters.

Nisma vjen në një kohë kur po shtohen shqetësimet për konsumin e burimeve nga këto objekte, të cilat luajnë një rol të rëndësishëm në zhvillimin e inteligjencës artificiale.

Bashkimi Evropian synon të trefishojë kapacitetin e qendrave të të dhënave gjatë shtatë viteve të ardhshme, për të mbështetur zhvillimin e shpejtë të IA-së dhe për të ulur varësinë nga kompanitë e mëdha amerikane të teknologjisë.

Megjithatë, zgjerimi mund të ushtrojë presion mbi rrjetet energjetike, të pakësojë burimet ujore dhe të rrisë emetimet e dioksidit të karbonit, nëse konsumi nuk menaxhohet siç duhet.

Për të nxitur investimet në qendra më efikase, Komisioni Evropian ka propozuar një sistem vlerësimi dhe etiketimi që do ta bëjë më transparent informacionin mbi përdorimin e energjisë dhe ujit.

Sistemi nuk do të vendoste kufizime të drejtpërdrejta mbi konsumin dhe as nuk do t’u kërkonte qendrave të deklaronin sasinë totale të energjisë që përdorin.

Sipas propozimit, operatorët e qendrave të të dhënave me kapacitet prej të paktën 500 kilovatësh do të duhej të raportonin efikasitetin e përdorimit të energjisë dhe ujit përmes një sistemi etiketimi të hartuar nga BE-ja.

Qëllimi është t’u mundësohet autoriteteve dhe palëve të interesuara të krahasojnë performancën e objekteve dhe të nxisin praktika më të qëndrueshme.

Qendrat do të duhej të publikonin gjithashtu informacion mbi lidhjen midis konsumit të tyre të ujit dhe nivelit të stresit ujor në zonën përreth.

Për më tepër, ato do të raportonin nëse mund të ofrojnë shërbime për sistemin energjetik lokal, përfshirë ripërdorimin e nxehtësisë së mbetur që prodhohet gjatë funksionimit të pajisjeve.

Etiketa e re mund të shërbejë si një hap paraprak drejt standardeve minimale të detyrueshme për efikasitetin e energjisë dhe ujit në qendrat e të dhënave.

Komisioni Evropian po punon aktualisht për zhvillimin e këtyre standardeve, të cilat mund të vendosin kërkesa më të detajuara në të ardhmen.