OKB – Asnjë kandidat nuk arrin konsensusin për të pasuar Guterresin

NJU JORK, 22 tetor /ATSH-AFP/ – Fuqitë e mëdha dështuan sot të binin dakord për një kandidat për të pasuar Antonio Guterresin si kreu i OKB-së, duke hapur derën për kandidatura të reja të mundshme.

Katër gra dhe tre burra aktualisht po garojnë për të pasuar 77-vjeçarin portugez, i cili do të përfundojë mandatin e tij të dytë pesëvjeçar në krye të këtij institucioni, të pllakosur nga krizat dhe përçarjet, më 31 dhjetor.

Në fund të një votimi që është ende vetëm tregues, asnjë nga shtatë kandidatët nuk arriti të shmangë një votë negative nga njëra prej pesë fuqive të mëdha (Britania e Madhe, Franca, Shtetet e Bashkuara, Kina dhe Rusia) nga 15 që përbëjnë Këshillin e Sigurimit.

Deri më tani, Rebeca Grynspan, 70 vjeçe, nga Kosta Rika, e cila drejtoi Agjencinë e Tregtisë dhe Zhvillimit të OKB-së (UNCTAD), kishte udhëhequr garën.

Gjatë votimit me dyer të mbyllura, shtetet anëtare i caktuan në mënyrë anonime secilit kandidat një vlerësim: “inkurajoj”, “dekurajoj” ose “pa mendim”.

Për herë të parë që nga fillimi i këtij procesi zgjedhor kompleks dhe jo transparent, votat e pesë anëtarëve të përhershëm, të cilët kanë të drejtë vetoje, u shfaqën me ngjyra.

Me nëntë vota “inkurajoj”, përfshirë tre nga fuqitë e mëdha, Rebeca Grynspan ende kryeson votimin, por ajo mori gjithashtu pesë vota “dekurajuese”, dy nga anëtarët e përhershëm dhe një “pa mendim”.

Pas saj janë Carolyn Rodrigues-Birkett, 53 vjeçe, ish-ministre e Punëve të Jashtme të Gujanës (8 “inkurajoj”, përfshirë 3 nga anëtarët e përhershëm), dhe kreu aktual i Agjencisë Ndërkombëtare të Energjisë Atomike (IAEA), argjentinasi Rafael Grossi, 65 vjeç (8 “inkurajoj”, përfshirë 2 nga anëtarët e përhershëm).

Të dy morën gjithashtu nga 6 “dekurajime”, përfshirë nga dy secila nga fuqitë e mëdha.

Pas tyre janë ish-presidenti i Senegalit Macky Sall, 64 vjeç (5 “inkurajoj”, 10 “dekurajoj”, 0 “pa mendim”), dhe ish-Përfaqësuesja Speciale e OKB-së për Fëmijët dhe Konfliktet e Armatosura, ugandezja Olara Otunnu, 76 vjeçe (4-10-1).

Në fund të listës janë ish-ministrja e Jashtme dhe e Mbrojtjes e Ekuadorit Maria Fernanda Espinosa, 62 vjeçe (3-9-3), dhe diplomatja ekuadoriane Ivonne A-Baki, 75 vjeçe (1-14-0).

Në vitin 1996, “Kofi Annan nuk ishte kandidat dhe ai u paraqit një ditë para se të zgjidhej”, kujtoi së fundmi një burim diplomatik./ a.jor.