Çështja Klan Kosova, paqartësi dokumentesh

Në Kosovë Ministria e Industrisë, Ndërmarrësisë dhe Tregtisë në Kosovë tha sot se ka siguruar dokumentacionin nga Maqedonia e Veriut, sipas të cilit pronari aktual i televizionit Klan Kosova, si person fizik, figuron i regjistruar si shtetas i Serbisë.
Ministria bëri publik dokumentin e nxjerrë nga regjistri qendror i Maqedonisë së Veriut, ku edhe është regjistruar biznesi i pronarit të Klan Kosova.

Në një dokument që ka siguruar sot Zëri i Amerikës nga regjistri qendror i Maqedonisë së Veriut, televizioni figuron i regjistruar me emërtimin Gjakovë – Kosovë. Të njëjtin dokument, por në gjuhën angleze, e publikoi gjatë ditës edhe Klan Kosova duke këmbëngulur se nga 20 qershori i këtij viti në çdo dokument të kompanisë qëndron vetëm emërtimi Kosovë.

E paqartë përse ministria e Tregëtisë ka përdorur adresën e pronarit si person fizik.

Parregullsitë në regjstrim të biznesit bënë që me 14 qershor qeveria e Kosovës të vendoste pezullimin e certifikatës së biznesit të televizionit Klan Kosova, me pretendimin se në regjistrimin e biznesit shkruan “Pejë – Serbia dhe Gjakovë – Serbia”.

Autoritetet thanë se “nuk lejohet regjistrimi i një biznesi ku vendbanimi është në kundërshtim me parimet themelore të Kushtetutës së Republikës së Kosovës”.

Me 16 qershor Komisioni i Pavarur i Mediave miratoi një vendim që detyronte televizionin Klan Kosova të plotësonte dokumentacionin e nevojshëm për mbajtjen e licencës brenda 30 ditësh.

Klan Kosova thotë se ka paraqitur dokumentet e plotësuara me 21 qershor në Agjencinë e Regjistrimit të Bizneseve e cila po atë ditë shfuqizoi vendimin për pezullimin e certifikatës. Por në ditë më pas vendimi u rikthye duke bërë që Klan Kosova të dërgojë ankesë në Komisionin për Shqyrtimin e Ankesave për Regjistrimin e Bizneseve.

Me 28 korrik ky Komision vendoi t’ia hedhë poshtë ankesën Klan Kosovës dhe ta konfirmojë përfundimisht pezullimin e certifikatës së biznesit të këtij televizioni. Në një njoftim të ministrisë së Industrisë thuhej se tashmë çështja është përmbyllur ndërsa “pala ankuese gëzon të drejtën për të parashtruar padi në gjykatën kompetente”.

Gazetarë dhe përfaqësues të shoqërisë civile në Kosovë protestuan të hënën kundër vendimit të qeverisë për pezullimin e certifikatës së biznesit të televizionit privat Klan Kosova, veprim që nxiti reagime në shkallë të gjerë.

Me moton “Demokracia vdes në errësirë”, grupe gazetarësh bënë thirje sot për zhbërjen e vendimit të qeverisë duke e cilësuar atë goditje të rëndë ndaj lirisë së medias.

Kryeredaktori i Klan Kosovës, Gazmend Syla, tha sot gjatë protestës se është i bindur që drejtësia do të hedhë poshtë vendimin e ministrisë.

“Ne besojmë fuqishëm në drejtësi dhe në autoritetin e pavarësinë e njerëzve që punojnë nëpër gjykata. Besojmë se ata në asnjë mënyrë nuk do të bien pre e çfarëdo lloj ndikimi që mund të ushtrohet ndaj tyre nga qeveria apo kushdo tjetër”, tha ai.

Pezullimi i certifikatës së biznesit të Klan Kosovës nxiti reagime të ashpra nga diplomatë perëndimorë, shoqata gazetarësh, përfaqësues të mediave, por edhe përfaqësues të opozitës.

Ambasadat e Shteteve të Bashkuara, Francës, Gjermanisë, Italisë, Mbretërisë së Bashkuar dhe Bashkimit Evropian u shprehën thellësisht të shqetësuara me vendimin për pezullimin e certifikatës së biznesit të Klan Kosovës që sipas tyre është një vendim joproporcional që do të ketë pasoja në pluralitetin mediatik në Kosovë.

Kryeministri i Kosovës Albin Kurti tha të shtunën se zbatimi i ligjit kundër sipërmarrësve të fuqishëm që e shkelin atë për përftime financiare, nuk paraqet sulm ndaj lirisë së medias. Ai theksoi se ndjekja e rregullave të regjistrimit është një detyrë ligjore, jo një “teknikalitet” dhe se sipas tij zbatimi i rregullave të tilla kundër një shkelësi të vetëm nuk kërcënon pluralizmin mediatik.

Të hënën ministria e Industrisë tha se u ka pezulluar certifikatat e biznesit edhe të paktën 5 kompanive të tjera që sipas saj, kanë emërtim kundërkushtetues, duke i paraqitur qytetet e Kosovës si pjesë të Serbisë.