Çmenduri nga Perez, 150 milionë euro për Julián Álvarez do të thyenin çdo rekord të Real Madridit

Florentino Pérez është gati të bëjë një lëvizje historike në merkato. Sipas të dhënave të publikuara, një ofertë prej 150 milionë eurosh për Julián Álvarez do ta bënte sulmuesin argjentinas blerjen më të shtrenjtë në historinë e Real Madridit.

Nëse Atletico Madridi do ta pranonte këtë shifër, Álvarez do të kalonte Jude Bellingham, i cili u transferua nga Borussia Dortmund për 127 milionë euro, si dhe Eden Hazard, që u bashkua me “Los Blancos” nga Chelsea për 121 milionë euro.

Pas tyre në renditjen e transferimeve më të kushtueshme të klubit vijnë Gareth Bale (101 milionë euro), Cristiano Ronaldo (94 milionë euro), Aurélien Tchouaméni (80 milionë euro), Zinedine Zidane (78 milionë euro), James Rodríguez (75 milionë euro), Kaká (67 milionë euro) dhe Luka Jović (63 milionë euro).

Ky investim prej 150 milionë eurosh do të ishte një goditje e fortë nga Real Madridi dhe do të konfirmonte se “mbretërit” e Europës janë të gatshëm të bëjnë gjithçka për të siguruar shërbimet e një prej sulmuesve më të kërkuar në futbollin botëror, sidomos nga Barcelona.