“CreativeMornings” për herë të parë në Tiranë
“CreativeMornings” ose ndryshe: Ligjërata mëngjesi për komunitetin krijues, do të zhvillohet për herë të parë në Tiranë. Një event tipik me ngjizje në New York, “CreativeMornings” është një seri leksionesh që bashkon çdo muaj komunitetin krijues të qytetit, për të dëgjuar një prezantim të posaçëm nga një folës/lektor i përzgjedhur si dhe për të zhvilluar pyetje dhe biseda brenda tematikës së muajit.
Këtë muaj tema është “Edukimi”.
“CreativeMornings” zhvillohet çdo muaj kudo nëpër botë, përkatësisht në 104 qytete, ashtu sikundër edhe online, ku bisedat dhe eventet projektohen nëpërmjet videove, fotografive dhe medias sociale. Këto evente rrokin live rreth 100 audienca të ndryshme, nga designers në interpretues arti tek pronarët e bizneseve apo inovatorët socialë. Përsa i përket Ballkanit, Tirana është qyteti i dytë pas Beogradit që bëhet pjesë e komunitetit krijues.
Në Tiranë leksioni i parë i kësaj serie do të ketë si ligjërues Alban Nimanin. (http://creativemornings.com/talks/alban-nimani ).
Kështu, Ora 9.30 am, ditën e premte bëhuni pjesë e “CreativeMornings” në Qendrën Kulturore “TULLA”.
Secili event zgjat 90 minuta dhe përfshin mëngjesin e lehtë dhe kafenë fantastike, së bashku me prezantimin e shkurtër dhe seancën e pyetjeve dhe përgjigjeve.
Një e premte tipike për CreativeMornings Tirana:
8.00 Zgjohu dhe merre ditën me buzëqeshje!
8.02 Bëje zilen e ores të pushojë…edhe pak!
9.30 Dyert janë të hapura, hyr dhe shijo mëngjesin.
10.00 Dëgjo një rrëfim super motivues!
10.25 Pyetje dhe përgjigje me folësin.
10.35 Ça përmes turmës dhe shoqërohu!
11.00 Koha për t’iu rikthyer punës.
