Çuçi: Vlerësim financiar për komunat e bashkitë para zgjedhjeve vendore

Ministri i Shtetit për Çështjet Vendore, Bledi Çuçi gjatë një seance dëgjimore të mërkurën në komisionin e Ligjeve tha se para zgjedhjeve vendore 2015 do të bëhet një vlerësim financiar i të gjitha komunave dhe bashkive.

Gjatë seancës në komision, e organizuar për problematikat e ngritura në progres raportin e KE-së, Çuçi tha se në 20 vjet, 70% e komunave nuk kanë bërë asnjë vlerësim, gjë që është e parashikuar në ligj. “Për ne është e rëndësishme ta bëjmë këtë vlerësim, që do të jetë i çertifikuar nga kompani audituese ndërkombëtare”, tha ministri.
Ai bëri të ditur se brenda muajit nëntor do të kalojë në qeveri dhe strategjia dhe plani i veprimit antikorrupsion për vitet 2014-2020.
Duke folur për problematikat e ngritura për pushtetin vendor në progres raportin për Shqipërinë, ministri Çuçi u ndal tek antikorrupsioni, për të cilin KE vlerëson rolin e Koordinatorit Kombëtar kundër Korrupsionit. Në këtë kuadër, tha ai, është përfunduar projekti i strategjisë dhe jemi në proces konsultimi me të gjithë aktorët që janë pjesë e planit kombëtar kundër korrupsionit.
“Mendojmë që brenda këtij viti ta kalojmë këtë dokument në qeveri për ta miratuar së bashku me strategjinë dhe planin e veprimit. Në fund të dhjetorit do të kemi një dokument me propozime, pjesë e të cilit është ligji ‘për bilbilfryrësit’, tha Çuçi.
Duke iu referuar progres raportit, ai nënvizoi nevojën për të ngritur Forumin Konsultativ Kombëtar për Antikorrupsionin, i cili, tha ministri, do të monitorojë strategjinë dhe planin e veprimit antikorrupsion