Dakordim trepalësh Ministri-Komunë-FFK për investime në Mitrovicë

Kryetari i Komunës së Mitrovicës, Faton Peci, ka bërë të ditur se sot ka pritur…

Kryetari i Komunës së Mitrovicës, Faton Peci, ka bërë të ditur se sot ka pritur në një takim të përbashkët ministrin e Sportit, Blerim Gashani dhe presidentin e Federatës së Futbollit të Kosovës, Agim Ademi, ku është arritur një dakordim i rëndësishëm për zhvillimin e sportit në qytet.

Sipas tij, në këtë takim është arritur marrëveshje trepalëshe ndërmjet Komunës së Mitrovicës, Ministrisë së Rinisë dhe Sportit dhe Federatës së Futbollit të Kosovës për ndërmarrjen e hapave konkretë në përmirësimin e infrastrukturës sportive.

“Takimi ishte tejet produktiv dhe i fokusuar në shtyrjen përpara të projekteve që synojnë ta transformojnë Mitrovicën në një qendër sportive për Kosovën”, ka theksuar Peci.

Ai ka bërë të ditur gjithashtu se është arritur pajtim edhe për mbështetje nga Ministria e Rinisë dhe Sportit për renovimin e qendrës sportive “Omni Sport”, një projekt që pritet të ndikojë drejtpërdrejt në përmirësimin e kushteve për sportistët dhe të rinjtë e qytetit.

Në fund, kryetari Peci ka nënvizuar se institucionet janë të përkushtuara që Mitrovica të trajtohet me dinjitet dhe të marrë zhvillimin që meriton në fushën e sportit.