DANIMARKË – FE: Rreziku i sulmeve ruse ndaj NATO-s nuk mund të përjashtohet

KOPENHAGË, 24 shtator /ATSH-AFP/- Një pushtim rus i një vendi anëtar të NATO-s nuk mund të përjashtohet, por mbetet “i pamundur” vlerësuan sot shërbimet ushtarake daneze të zbulimit (FE).

Paralajmërimi vjen në një kohë kur shqetësimet për sigurinë evropiane dhe kërcënimet që lidhen me luftën në Ukrainë vazhdojnë të rriten.

“Ekziston një rrezik i ulët, por në rritje, që Rusia të ndërmarrë sulme të kufizuara ushtarake kundër një vendi të NATO-s në kufi me Rusinë”, deklaroi Thomas Ahrenkiel, kreu i FE-së, gjatë një konference për shtyp.

Megjithatë, Ahrenkiel theksoi se shërbimet daneze vazhdojnë ta konsiderojnë të pamundur që Rusia të shohë ndonjë interes në pushtimin e një vendi të NATO-s.

“Ne nuk mund ta përjashtojmë këtë mundësi”, shtoi ai, duke nënvizuar pasigurinë që lidhet me synimet e Moskës dhe zhvillimet e ardhshme të konfliktit.

Në vlerësimin e tyre të ri për kërcënimin rus, inteligjenca ushtarake daneze e përshkruan mundësinë e një pushtimi, si edhe intensifikimin e sulmeve hibride, si skenarë të lidhur me një situatë ku Rusia mund të veprojë nga dëshpërimi.

Sipas vlerësimit, një veprim i tillë mund të ndodhë në muajt e ardhshëm, me synimin për të larguar vëmendjen e vendeve evropiane nga angazhimi i tyre në mbështetje të Ukrainës.

Megjithatë, përpara se të ndërmerrte një operacion të tillë, Moska do të kishte nevojë për të paktën gjashtë muaj për përgatitjet dhe grumbullimin e forcave të nevojshme.

Kjo periudhë do t’i mundësonte ushtrisë ruse të organizonte kapacitetet ushtarake dhe logjistike të nevojshme për një ndërhyrje të mundshme.

Ndër skenarët e përmendur nga inteligjenca daneze është mundësia që Rusia të kryejë sulme të kufizuara ndaj infrastrukturës që mbështet Ukrainën.