“Dhuna nuk justifikohet”, Demo: Goditja ndaj efektivëve nuk është ushtrim i së drejtës për të protestuar

Ministri i Brendshëm, Ervin Demo ka dënuar dhunën që sipas tij kanë ushtruar protestuesit ndaj efektivëve të Policisë së Shtetit, në tubimin që nisi përpara Ministrisë së Arsimit dhe Sportit.

Ai theksoi se dhuna është e patolerueshme dhe se Policia do vazhdojë punën e saj për të garantuar rendin dhe sigurinë.

“Gjashtë efektivë të Policisë së Shtetit mbetën të plagosur ndërsa kryenin detyrën për garantimin e rendit dhe sigurisë. E dënoj pa asnjë rezervë dhunën ndaj tyre.

Ata dhe familjet e tyre kanë mbështetjen dhe solidaritetin tim të plotë. Policia e Shtetit do të vijojë të përmbushë detyrën e saj për garantimin e rendit dhe sigurisë, duke respektuar të drejtën për protestë paqësore dhe duke vepruar me profesionalizëm, përmbajtje dhe në përputhje me ligjin. Në këto momente, përgjegjësia e secilit është të kontribuojë në uljen e tensioneve”, tha ai.