Durrës, 28-vjeçari i kthyer nga Greqia kërcënon me vetëvrasje

Prej disa orësh, një 28-vjeçar nga Luznia e Dibrës kërcënon me vetëvrasje, teksa qëndron në majë të skelave të një fabrike në Maminas të Durrësit.
Negociatoret e RENEA-s dhe dy vëllezërit e tij vazhdojnë të bisedojnë me të, por deri tani negociatat kanë rezultuar të pasuksesshme.
I riu quhet Klodian Hasa dhe është baba i dy fëmijëve. Sipas familjarëve dhe negociatorëve, Hasa ka probleme të shëndetit mendor dhe është i paqëndrueshëm në ato që thotë.
Ai sapo është kthyer nga Greqia ku ka shfaqur probleme të tilla dhe natën e kaluar është larguar nga banesa e disa familjarëve në Tiranë. Mëngjesin e sotëm, rreth orës 06.00 ka qenë roja e fabrikës që e ka diktuar dhe njoftuar policinë.
Nga fjalët që thotë dyshohet se presioni i autoritetit të vëllait të madh në familje dhe menaxhimi i parave të fituara në emigracion prej tij mund të jenë faktorë që kanë ndikuar në çekuilibrimin psikik të 28-vjeçarit.