Dyfishohen rastet e evazionit fiskal

Ekonomia informale vijon të mbetet një shqetësim për ekonominë shqiptare. Vetëm gjatë vitit 2025, rastet e dyshuara për evazion fiskal dhe fshehje të ardhurash kanë arritur në 85, nga 31 që ishin një vit më parë.

Ndërkohë, 80 raste janë referuar pranë Tatimeve, mbi trefish më shumë krahasuar me vitin 2024.

Sipas raportit të Agjencisë së Inteligjencës Financiare, dyshimet lidhen me transferta të pajustifikuara, depozitime cash me burim të paqartë fondesh, si edhe qarkullim parash përmes personave të tretë apo bizneseve të lidhura.

Ekspertët e ekonomisë shpjegojnë se rritja e rasteve lidhet me nivelin e lartë të ekonomisë cash dhe informalitetit në sektorë të caktuar të tregut.

“Rritja e rasteve të dyshuara për evazion fiskal tregon se ekonomia informale vijon të ketë peshë të konsiderueshme në vend. Në shumë sektorë vazhdon dominimi i pagesave cash dhe mosdeklarimi i plotë i të ardhurave, çka e bën më të vështirë kontrollin fiskal dhe dëmton konkurrencën në treg”, tha eksperti i ekonomisë, Eduart Gjokutaj.

Raporti evidenton gjithashtu se transaksionet e dyshimta shfaqen në forma të ndryshme, nga fshehja e të ardhurave deri te transfertat pa dokumentacion të besueshëm apo përdorimi i kompanive për qarkullim fondesh.

“Pasojat e evazionit fiskal nuk i ndjen vetëm buxheti i shtetit. Në fund koston e paguajnë qytetarët dhe bizneset e ndershme, pasi informaliteti ul të ardhurat publike, frenon investimet dhe krijon pabarazi në ekonomi. Sa më i lartë informaliteti, aq më e vështirë bëhet ndërtimi i një tregu të qëndrueshëm dhe transparent”, u shpreh Gjokutaj.

Në raport theksohet se rastet e referuara lidhen kryesisht me dyshime për evazion fiskal, mashtrim financiar dhe qarkullim të pajustifikuar fondesh, ndërsa institucionet pritet të intensifikojnë kontrollet gjatë këtij viti.

ECURIA E EVAZIONIT FISKAL

	2024	2025
Raste për evazion fiskal	31	85
Raste të referuara në Tatime	25	80
Total raste të referuara	259	269

/tvklan.al