EBU mbështet reformën në RTSH, kërkon stabilitet institucional dhe digjitalizimin e arkivit

Bashkimi Evropian i Transmetimeve (EBU) ka shprehur mbështetje për procesin e reformës dhe transformimit institucional të Radio Televizionit Shqiptar, duke vënë theksin te stabiliteti institucional, financimi i qëndrueshëm dhe përshtatja e strukturës së transmetuesit publik me zhvillimet e reja në media.

Në një seancë të Komisionit për të Drejtat e Njeriut dhe Mjetet e Informimit Publik, Radka Betcheva, drejtuese e EBU-së për Marrëdhëniet me Anëtarët për Evropën Qendrore dhe Lindore, vlerësoi rëndësinë e një institucioni të qëndrueshëm dhe të financuar në mënyrë të përshtatshme. Ajo theksoi se modeli aktual i organizimit të RTSH-së, me drejtues të veçantë për televizionin dhe radion, paraqet sfida për riorganizimin dhe përshtatjen me ndryshimet e shpejta në sektorin mediatik.

Sipas Betchevës, financimi përmes taksës së televizionit mbetet një mekanizëm i rëndësishëm për transmetuesin publik, pasi krijon një lidhje të drejtpërdrejtë mes publikut dhe institucionit. Ajo nënvizoi se çdo ndryshim i financimit duhet të lidhet me nevojat reale të RTSH-së dhe shërbimet që ai duhet të ofrojë.

“Ne kemi nevojë për një ristrukturim më të shpejtë por kjo vjen me një faturë më të lartë financiare dhe pavarësisht mbështetjes që i kemi dhënë këtu në komision, të dy kahët e politikës, si zonja Luarasi ashtu edhe unë, nga pikëpamja e rritjes së buxhetit, ka një konflikt interesesi, sepse buxhetin qeveria e miraton. Të paktën, në dy herët e fundit nuk ka pasur hapësirë për të gjitha kërkesat që RTSH ka sjellë”, u shpreh kryetarja e komisionit, Jorida Tabaku.

Gjatë diskutimit, përfaqësuesja e EBU-së kërkoi gjithashtu mbështetje institucionale për digjitalizimin e arkivit të RTSH-së. Ajo paralajmëroi se një pjesë e materialeve arkivore po dëmtohen me kalimin e viteve dhe se humbja e tyre do të përbënte një dëm përtej vetë transmetuesit publik.

Betcheva e cilësoi arkivin e RTSH-së si pjesë të trashëgimisë kombëtare, pasi materialet e ruajtura dokumentojnë zhvillime të rëndësishme të historisë, kulturës dhe identitetit shqiptar.

“Bëni një akt për të mbështetur digjitalizimin e arkivit”, ishte apeli i saj drejtuar institucioneve shqiptare, duke sjellë si shembull përvojën e Çekisë në ruajtjen dhe digjitalizimin e arkivave audiovizive.

Përfaqësuesja e EBU-së shprehu gjithashtu mbështetje për procesin e transformimit të RTSH-së dhe për drejtuesen e institucionit, Eni Vasili, duke e lidhur zhvillimin e transmetuesit publik me nevojën për stabilitet, financim të qëndrueshëm dhe modernizim.