Ekonomi: Reformat për ristrukturimin e ekonomisë morën nota pozitive në Paris

Ministrja e Zhvillimit Ekonomit, Turizmit, Tregtisë dhe Sipërmarrjes, Milva Ekonomi, deklaroi të enjten se reformat strukturore të ndërmarra nga qeveria shqiptare morën nota pozitive në forumin e Parisit të mbajtur në fillim të kësaj jave.

Deklarata e ministres Ekonomi u bë gjatë një takimi të zhvilluar në Tiranë, për prezantimin e programit të reformave ekonomike të qeverisë shqiptare për periudhën 2017-2019, në bashkëpunim me Bashkimin Europian dhe OECD.

Momenti i hartimit të programit ekonomik, sipas ministres Ekonomi, ishte momenti i daljes së Ballkanit Perëndimor nga kriza ekonomike globale dhe vendosjes së stabilitetit makrofiskal për secilin vend. Kështu, vijoi ajo, padyshim programi i reformave ekonomike është një instrument që duhet ta përdorim për konsolidimin tonë fiskal dhe vazhdimin e ristrukturimit të ekonomisë.

“Lajmi i mirë që vjen nga Parisi është se vendet e Ballkanit ia dolën sepse kanë dalë nga kriza. Rritja ekonomike prej 2.1 % në mesataren e Ballkanit ishte tregues shumë i mirë për të treguar se reformat strukturore që këto vende ndërmorën patën rezultate konkrete”, u shpreh ministrja.

Sipas saj. Shqipëria duhet të ndihet e kënaqur, sepse rritja ekonomike prej 2.6 % ishte një tregues që tregon se iniciativat për reformat strukturore dhanë impute pozitive.

Shqipëria u veçua, tha më tej ministrja, edhe për sa i takon marrjes së masave për të menaxhuar kreditë e këqija. Në forumin e Parisit, deklaroi Ekonomi, Shqipëria u cilësua si një nga vendet e Ballkanit që ka arritur sukses.

“Treguesit për vitin 2015-2016 duke u matur me tremujor nxorën se portofoli i kredive të këqija ra gati me 7 %, që tregon se ishte një rezultat pozitiv dhe që u vlerësua në Paris dhe u përmend si pjesë e gjithë kësaj platforme ekonomike që ne kemi ndërmarrë”, u shpreh Ekonomi.

Programi i Reformave Ekonomike 2017-2019 do të hartohet bashkërisht me ministritë e linjës, në shërbim të reformave strukturore që synojnë të rrisin konkurueshmërinë ekonomike të Shqipërisë. I gjithë ky proces koordinohet nga MZHETTS. Bashkërendimi me BE për sa i përket qeverisjes ekonomike dhe vendosjes së prioriteteve strukturore ka tashmë një rëndësi të dorës së parë.

Këto, ministrja Ekonomi i cilësoi si reforma që ndihmojnë rritjen e konkurueshmërisë dhe rritjen ekonomike dhe që integrohen me procese të tjera zhvillimore si procesi i Berlinit etj, duke kombinuar masat tona dhe ato rajonale.

“Këto janë reforma të domosdoshme zhvillimi dhe shkojnë përtej mandateve politike. Përfitojmë nga ekspertiza më e mirë e BE dhe OECD qofte për të diagnostikuar dhe përcaktuar fushat që kanë nevojë për ndërhyrje, qoftë mënyrën e adresimit të tyre”, tha ministrja Ekonomi në fjalën e saj.