Emiratet e Bashkuara Arabe në alarm, zbulohet kërcënim raketor ndaj vendit

Ministria e Mbrojtjes e Emirateve të Bashkuara Arabe ka njoftuar se sistemet e mbrojtjes ajrore të vendit kanë zbuluar një kërcënim raketor.

Në një deklaratë të publikuar në rrjetet sociale, ministria u ka bërë thirrje qytetarëve dhe banorëve që të ndjekin vetëm njoftimet dhe udhëzimet e publikuara nga burimet zyrtare.

Autoritetet kanë paralajmëruar gjithashtu se tingujt e fortë që mund të dëgjohen në zona të ndryshme mund të lidhen me operacionet e përgjimit dhe reagimit të sistemeve të mbrojtjes ajrore ndaj kërcënimeve raketore.

Ministria e Mbrojtjes deklaron se strukturat e saj janë në “gatishmëri të plotë” dhe të përgatitura për t’iu përgjigjur çdo kërcënimi që mund të cenojë sovranitetin, sigurinë dhe stabilitetin e Emirateve të Bashkuara Arabe.

Deri në publikimin e këtij njoftimi, nuk janë dhënë detaje të tjera mbi origjinën e kërcënimit apo nëse janë shkaktuar dëme.