Erdogan: Turqia ka qëndruar larg konflikteve rajonale, nuk biem pre e provokimeve

ANKARA, 19 tetor /AA/ ATSH/ – Presidenti i Turqisë, Recep Tayyip Erdogan, deklaroi se vendi i tij ka arritur të qëndrojë jashtë konflikteve rajonale, pavarësisht përshkallëzimit të tensioneve dhe krizave në Lindjen e Mesme dhe më gjerë.

Duke folur në një takim në Kompleksin Presidencial në Ankara, me rastin e Ditës së Mukhtarëve, përfaqësuesve të zgjedhur të lagjeve dhe fshatrave, Erdogan vlerësoi qasjen e kujdesshme dhe të matur të qeverisë së tij përballë zhvillimeve të sigurisë në rajon.

“E kemi mbajtur vendin tonë larg konflikteve përreth nesh. Nuk u jemi nënshtruar provokimeve. Nuk kemi rënë në kurthe dhe nuk kemi lejuar të tërhiqemi në provokime”, u shpreh Erdogan.

Ai theksoi se Turqia i ka përballuar këto procese të vështira me inteligjencë, durim dhe gjykim të shëndoshë, duke nënvizuar se qeveria po punon vazhdimisht për të mbrojtur vendin nga pasojat e krizave që e rrethojnë.

Duke iu referuar situatës së sigurisë në rajon, Erdogan përmendi luftën Rusi-Ukrainë, sulmet izraelite ndaj palestinezëve, tensionet në Iran dhe përshkallëzimin e situatës në Jemen. Sipas tij, zhvillimet në këto vende dhe zonat përreth po shtojnë pasigurinë dhe rrezikun e përhapjes së konflikteve.

Presidenti turk u ndal edhe te sulmet e rebelëve Huthi në Jemen ndaj Arabisë Saudite, të cilën e cilësoi si një vend mik dhe vëllazëror për Turqinë. Ai përmendi gjithashtu sulmin ndaj një aeroporti në Riad, ku, sipas deklaratave të tij, pati viktima dhe qindra të plagosur.

Sa i përket Libanit, Erdogan tha se situata mbetet shqetësuese, ndërsa akuzoi Izraelin se po përpiqet të destabilizojë Sirinë, pavarësisht zhvillimeve që ai i cilësoi pozitive në këtë vend.

“Siç e them shpesh, jemi të rrethuar nga një unazë zjarri. Pikërisht kjo është situata me të cilën përballemi”, deklaroi Erdogan, duke nënvizuar se autoritetet turke po punojnë ditë e natë për të mbrojtur vendin nga pasojat e krizave rajonale.

Ai përsëriti angazhimin e qeverisë së tij për të mos lejuar përfshirjen e Turqisë në konfliktet e vendeve fqinje, duke e paraqitur politikën e kujdesshme dhe të matur si një faktor kyç për përballimin e paqëndrueshmërisë në rritje.

Deklaratat e presidentit turk vijnë në një periudhë tensionesh të shumta në Lindjen e Mesme, ku konfliktet dhe përplasjet në disa fronte kanë shtuar shqetësimet për sigurinë dhe stabilitetin rajonal.