Ethet e Nilit Perëndimor: katër ditë pa raste të reja, 12 pacientë në Klinikën Infektive — tre në kujdes intensiv

Ethet e Nilit Perëndimor duket se kanë “ngrirë” — që nga 19 shtatori, Klinika Infektive në Shkup nuk ka regjistruar asnjë shtrim të ri të pacientëve me këtë virus, çka do të thotë katër ditë pa raste të reja.

Aktualisht në klinikë po trajtohen 12 pacientë me ethe të Nilit Perëndimor, prej të cilëve tre janë në kujdes intensiv dhe marrin mbështetje me oksigjen, sipas raportimit të sotëm të portalit maqedonas Колегиум.

Lajmi i mirë vjen pas viktimës së nëntë të regjistruar nga virusi më 21 shtator: një 66-vjeçar nga Kumanova, i cili nuk arriti të mbijetojë pas 28 ditësh të shtruari në spital.

Ndërkohë, autoritetet po përgatisin strategjinë afatgjatë për luftimin e mushkonjave: spërkatja nga ajri parashikohet të braktiset brenda 3 deri në 5 viteve, ndërkohë që në betejën kundër virusit të Nilit Perëndimor do të zbatohen përvojat e mira të fituara nga Greqia.

Burimi: Колегиум