Eurodeputeti bullgar Kovačev: EPP ka nisur procedurën kundër SNS-së së Vuçiçit — “Mjaft më, luajti gjatë në të dyja anët”

Eurodeputeti bullgar Andrej Kovačev, kreu i delegacionit bullgar në grupin e Partisë Popullore Evropiane (EPP), ka njoftuar se EPP ka nisur procedurën kundër anëtares së saj të asociuar, Partisë Progresive Serbe (SNS) të Aleksandar Vuçiçit. Njoftimi u bë të premten, më 18 shtator, në forumin “EU Meets the Balkans” të mbajtur në Sofje.

Kovačev, deputet evropian që nga viti 2009 nga radhët e partisë GERB, deklaroi se zërat brenda EPP-së kundër Vuçiçit po bëhen gjithnjë e më të fortë. “Mjaft më, kemi pritur shumë gjatë — Aleksandar Vuçiçi ka luajtur gjatë në të dyja anët”, u citua të ketë thënë Kovačev nga mediat serbe.

Ai nuk i kurseu as kritikat ndaj udhëheqësve evropianë, duke përmendur kancelarin gjerman Friedrich Merz dhe presidentin francez Emmanuel Macron për mesazhet e paqarta. “Na duhet Serbia… ata gjithmonë shpresojnë se ajo që iu thotë Aleksandari është e vërteta, por nuk është”, tha ai.

Deklarata vjen në një moment tensioni brenda EPP-së ndaj Serbisë. Partia Popullore Evropiane së fundmi dënoi ashpër praninë e zyrtarëve të lartë serbë dhe dhënien e nderimeve ushtarake në varrimin e Ratko Mladićit, duke paralajmëruar se e ardhmja evropiane e Serbisë vihet në pikëpyetje për shkak të glorifikimit të kriminelëve të luftës. Kritikat u përsëritën edhe nga eurodeputeti Davor Ivo Štir në debatin e kësaj jave në Parlamentin Evropian.

Burimi: Danas