Ministrja Gorçeviq: kapitujt 18 dhe 19 mbyllen para konferencës ndërqeveritare të tetorit

Ministrja e Çështjeve Evropiane të Malit të Zi, Maida Gorçeviq, deklaroi se është realiste të pritet mbyllja e kapitujve negociues 18 dhe 19 përpara konferencës ndërqeveritare që do të mbahet në tetor. Në një prononcim për agjencinë MINA, ajo tha se mbetet vetëm përmbyllja e procedurës në parlamentin holandez, ndërsa të gjitha shtetet e tjera anëtare të BE-së kanë dhënë tashmë dritën jeshile.

Sipas saj, deri në fund të shtatorit Mali i Zi do të përfundojë pjesën teknike të procesit dhe do të dorëzojë të gjitha pozicionet negociuese, me synimin ambicioz që të gjithë kapitujt të mbyllen deri në fund të vitit.

Gorçeviq mohoi që data 22 shtator të jetë caktuar zyrtarisht për mbajtjen e konferencës ndërqeveritare. “As Qeveria, as Komisioni Evropian nuk e kanë njoftuar zyrtarisht datën”, u shpreh ajo, duke kritikuar mediat që nxjerrin përfundime nga burime anonime dhe duke paralajmëruar për kujdes ndaj dezinformimit në këtë fazë finale, më të ndjeshmen të procesit të anëtarësimit.

Ministrja sapo u kthye nga një vizitë në Lituani, nga ku tha se siguroi mbështetje të fortë për rrugën evropiane të Malit të Zi. Javën e ardhshme, në Podgoricë priten përfaqësues të grupit të punës COELA të Këshillit të BE-së, si edhe të grupit për hartimin e Traktatit të Pranimit – një tjetër sinjal se procesi po hyn në fazën përmbyllëse.

Burimi: Vijesti