Euronews Albania rikthehet në Instagram, Meta po heton rastin

Pas më shumë se dy ditësh jashtë Instagramit, llogaria zyrtare e Euronews Albania është rikthyer dhe është sërish e aksesueshme për publikun.

Rikthimi vjen pas një angazhimi të gjerë dhe komunikimeve të vazhdueshme me Meta-n, ndërsa çështja që çoi në pezullimin e llogarisë vijon të jetë nën investigim nga kompania.

Gjatë këtyre ditëve, Euronews Albania mori mbështetje nga gazetarë, organizata për mbrojtjen e lirisë së medias dhe të drejtave të njeriut, përfaqësues europianë dhe partnerë ndërkombëtarë, të cilët kërkuan transparencë dhe sqarimin e plotë të rastit.

Falënderojmë të gjithë ata që bashkëpunuan, reaguan dhe ndihmuan në adresimin e kësaj situate.

Rikthimi i llogarisë është një zhvillim pozitiv, por mbetet thelbësore që të sqarohet se çfarë çoi në pezullimin e saj dhe të garantohet që mekanizmat e raportimit në platformat sociale të mos keqpërdoren për të kufizuar punën e mediave.

Euronews Albania do të vijojë të informojë publikun dhe të kërkojë transparencë të plotë mbi këtë rast.