Evropa mbetet pas SHBA-së në përdorimin e inteligjencës artificiale

Një studim i ri tregon se Evropa mund të jetë më e ngadaltë se Shtetet e Bashkuara në integrimin e inteligjencës artificiale (AI).

Raporti i Institutit Brookings ka anketuar mbi 5,000 persona në SHBA dhe në gjashtë vende evropiane — Francë, Gjermani, Holandë, Suedi, Itali dhe Mbretërinë e Bashkuar — gjatë periudhës qershor 2025 dhe shkurt 2026, për të matur përdorimin e AI në vendin e punës.

Sipas të dhënave, kompanitë amerikane janë më të prira të integrojnë AI në aktivitetet e përditshme, me rreth 34% që e përdorin krahasuar me një mesatare prej 20% në Bashkimin Evropian. Në nivel individual, 43% e punonjësve në SHBA deklarojnë se përdorin AI në punë, ndërsa në Evropë kjo shifër është 32% në vitin 2026.

Dallimet brenda Evropës janë gjithashtu të dukshme. Mbretëria e Bashkuar, Suedia dhe Holanda raportojnë nivele më të larta përdorimi, ndërsa Italia ka shkallën më të ulët, me vetëm një në katër punonjës që përdorin AI në punë. Në Francë dhe Gjermani, përdorimi është në ngadalësim.

Studiuesit theksojnë se një nga faktorët kryesorë të këtij hendeku është mënyra e menaxhimit të kompanive. Në SHBA, punonjësit më shpesh inkurajohen nga drejtuesit të përdorin AI dhe u jepen mjete specifike për ta bërë këtë, ndërsa në vende si Franca dhe Italia kjo mbështetje është shumë më e ulët.

Sipas raportit, pothuajse e gjithë diferenca mes SHBA-së dhe Evropës shpjegohet nga niveli i mbështetjes dhe inkurajimit brenda kompanive.

Të dhënat tregojnë gjithashtu se faktorët demografikë luajnë rol: përdorimi i AI është më i lartë te burrat, të rinjtë nën 45 vjeç dhe personat me arsim universitar.