BERLIN – Merz: Ndihma për Ukrainën nuk cenon fondet për politikat sociale

BERLIN, 14 tetor /ATSH-DPA/- Ndihma që Gjermania i jep Ukrainës nuk pakëson fondet për shpenzimet sociale, deklaroi sot kancelari gjerman Friedrich Merz.

Ai akuzoi partitë e ekstremit të majtë dhe atyre të djathtë, se po e minimizojnë rrezikun që vjen nga Rusia.

“Jo asnjë euro që i jepet Ukrainës nuk merret nga fondet që vendi ynë shpenzon për politikat sociale dhe arsimin”, tha Merz në një fjalim në Bundestag, Dhoma e Ulët e Parlamentit gjerman.

“Gjermania dëshiron një Evropë paqësore, të lirë dhe të sigurt. Për këtë arsye, Berlini po investon për të forcuar aftësitë e veta mbrojtëse dhe po mbështet Ukrainën në përpjekjet e saj për t’u mbrojtur nga sulmet ruse”, tha ai.

Sipas Merz, vetëm përmes investimeve në siguri, mund të krijohen kushtet që liria dhe drejtësia të zhvillohen në Gjermani.

Kancelari paralajmëroi se shoqëria e lirë gjermane po përballet me një kërcënim konkret.

Ai përmendi gatishmërinë gjithnjë e më të madhe të Rusisë, për ta përshkallëzuar situatën dhe për t’i shtuar tensionet dhe veprimet kërcënuese.

Deklarata e tij erdhi në të njëjtën ditë kur parlamenti i landit Saksoni-Anhalt miratoi një mocion simbolik, të paraqitur me nismën e partisë së ekstremit të djathtë Alternativa për Gjermaninë (AfD).

Mocioni kërkon heqjen e sanksioneve ndaj Rusisë dhe ndalimin e mbështetjes për Kievin. /