Familja ulqinake i trembet hakmarrjes: denoncuan fajdetë dhe u dogj restoranti

Një familjeje nga Ulqini, para dy netëve, iu dogj një pjesë e restorantit “Barbosa”, ndërsa anëtarët e saj dyshojnë se bëhet fjalë për hakmarrje, sepse në fund të majit denoncuan vite të tëra fajdesh, zhvatjeje dhe kërcënimesh, siç raporton Vijesti.

Ata i thanë gazetës se i tremben se objektivi i radhës mund të jetë ndonjë pjesëtar i familjes, shtëpia e tyre ose punonjësit. Në momentin e sulmit në restorant ndodheshin tre punëtorë, reagimi i shpejtë i të cilëve e ndaloi përhapjen e zjarrit, që më pas e shuan edhe anëtarët e familjes dhe zjarrfikësit.

Pamjet e kamerave të sigurisë, të cilat Vijesti i ka parë, tregojnë se të hënën, rreth orës 22:40, në parkingun e “Barbosa”-s mbërriti një “audi” me ngjyrë blu të errët. Nga automjeti dolën dy burra, të cilët nxorën një bidon plastik të bardhë, ndërsa njëri prej tyre kaloi gardhin, iu afrua objektit dhe i vuri flakën. Në atë objekt jetojnë të tre punëtorët, jetët e të cilëve, sipas familjes, u rrezikuan drejtpërdrejt. Nga Drejtoria e Policisë i thanë jozyrtarisht gazetës se po bëjnë gjithçka për ta zbardhur sulmin.

Familja e lidh sulmin me denoncimin e fajdeve, pas të cilit, para disa muajsh, u arrestuan tre podgoricas. “I vetmi arsyetim logjik për këtë sulm është fakti se familja ime, pas dhjetë vjetësh ferri që kaluam për shkak të fajdeve, zhvatjeve dhe presioneve të ndryshme, në maj të këtij viti mori guximin dhe denoncoi gjithçka”, tha bashkëbiseduesi i Vijesti-t, duke shtuar se familja jeton dhe punon prej kohësh në Ulqin dhe kurrë më parë nuk kishte pasur probleme të këtij lloji.

Pas denoncimit të familjes, në fund të majit dhe në fillim të qershorit u arrestuan Petar Kusovac, Goran Vuković dhe Dragan Ivanović, nën dyshimin se kishin marrë pjesë në dhënien e parave me fajde. Kusovacit dhe Vukovićit iu ngarkua edhe rrezikimi i sigurisë së prindërve të të dëmtuarit. Sipas policisë, nga një hua fillestare prej 20.000 eurosh, përmes kamatave të fajdeve dhe borxheve të pretenduara, ishte përfituar në mënyrë të paligjshme pothuajse dy milionë euro në dëm të të dëmtuarit, të cilin, përmes sistemit të basteve sportive, të dyshuarit e kishin ngarkuar me borxhe të mëtejshme dhe me të ashtuquajtura penale, duke ia llogaritur borxhin rreth gjysmë milioni euro deri në fund të majit. Prindërit e të dëmtuarit kishin rrëfyer asokohe se i kishin kërcënuar se do t’i therin si lepuj, nëse nuk jepnin gjysmë milioni euro.

Bashkëbiseduesi i gazetës thotë se, gjatë denoncimit, policët i kishin inkurajuar të denonconin të gjithë ata që kishin marrë pjesë në fajde dhe zhvatje dhe i kishin siguruar se familja do të ishte plotësisht e sigurt. Por ai thotë se nuk ka vënë re se është bërë diçka domethënëse për parandalimin e ngjarjeve të tilla dhe se shumë prej personave të proceduar i takon përditë, duke u përballur me provokime të llojeve të ndryshme. Zjarrvënien e përjetojnë si paralajmërim dhe i tremben se sulmet mund të vazhdojnë, ndaj nga organet kompetente presin mbrojtjen e familjes, të punonjësve dhe të pronës. “Nuk kemi bërë asgjë tjetër, përveçse denoncuam njerëz që shkelën ligjin, maltretuan familjen tonë, na zhvatën para dhe na morën kamatë”, tha ai.