Fanella e Peles nga finalja e Kupës së Botës 1958 shitet 4,9 milionë dollarë

LONDËR, 17 korrik /ATSH-DPA/- Fanella, që legjenda braziliane Pele veshi në finalen e Kupës së Botës 1958, është shitur për 4,9 milionë dollarë, në një ankand të zhvilluar në Nju Jork.

Fanella me numrin 10 u vesh nga Pele, i cili në atë kohë ishte vetëm 17 vjeç, në fitoren 5-2 të Brazilit ndaj Suedisë.

Në atë ndeshje, ai u bë futbollisti më i ri në histori, që shënoi gol në një finale të Kupës së Botës, një rekord që vazhdon të mbetet në fuqi edhe sot.

Shtëpia e ankandeve “Sotheby’s” bëri të ditur se kjo është fanella e dytë më e shtrenjtë e futbollit, e shitur ndonjëherë në ankand.

Rekordin e mban fanella e Diego Maradona, e veshur në ndeshjen ndaj Anglisë në Kupën e Botës 1986, ku ai shënoi golin e famshëm të njohur si “Dora e Zotit”.

Ajo u shit në vitin 2022 për 9,3 milionë dollarë. /