IZRAEL – Ushtria izraelite tërhiqet nga Hebroni pas më shumë se një jave operacionesh ushtarake

RAMALLAH, 2 nëntor /ATSH-DPA/ – Ushtria izraelite po tërhiqet nga qyteti i Hebronit në Bregun Perëndimor, më shumë se një javë pas nisjes së operacionit ushtarak, njoftoi sot guvernatori i qytetit, Khaled Dudin.

Ai deklaroi se forcat palestineze të sigurisë kanë marrë përsëri kontrollin e plotë të zonës dhe se rreth 3 300 banorë, të larguar nga shtëpitë gjatë operacionit, mund të kthehen.

Megjithatë, sipas guvernatorit, një pjesë e madhe e banesave është shkatërruar. Autoritetet kanë paralajmëruar marrjen e masave të menjëhershme për rindërtimin e tyre.

Operacioni ushtarak izraelit nisi pasi dy palestinezë nga Hebroni vranë dy ushtarë izraelitë dhe plagosën tre të tjerë. Dy personat e dyshuar për sulmin u vranë gjithashtu.

Ushtria izraelite e cilësoi ndërhyrjen si operacion kundër terrorizmit.

Gjatë ditëve të fundit, sipas saj, u arrestuan disa persona të dyshuar dhe u sekuestruan armë.

Ushtarët kontrolluan gjithashtu qindra banesa, ndërsa qyteti u izolua nga pjesa tjetër e zonës.

Zyra e Kombeve të Bashkuara për Koordinimin e Çështjeve Humanitare (OCHA) raportoi se më shumë se 3 000 persona u detyruan të largoheshin nga banesat e tyre dhe se gjatë operacionit u shkatërruan shtëpi dhe dyqane. Shumica e të zhvendosurve gjetën strehim te të afërmit.

Sipas OKB-së, disa ushtarë izraelitë përdorën gjithashtu ndërtesa banimi si pika ushtarake. /