“Festivali Folklorik” çel siparin në Kotë të Selenicës, grupet e polifonisë labe në skenë

Ka celur siparin në Kotë të Selenicës “Festivali Folklorik, edicioni i 4”. Për tre ditë me radhë, në qendër të fshatit performojnë grupet e polifonisë labe nga fshatrat e Selenicës, në natën finale shpallet edhe fituesi i këtij edicioni.

I ngjitur në skenë për fjalën përshëndetëse, kryetari i Bashkisë Selenicë, Nertil Bellaj, e cilëson polifoninë si pasaportën më të mirë të historisë, kulturës dhe traditës së zonës. Bellaj thotë se organizime të tilla do të vijojnë edhe në vitet e ardhshme.

Ky festival ka mbledhur në qendër të Kotës banorë të fshatrave, emigrantë të kthyer në atdhe, por edhe të huaj që vlerësojnë aktivitetet e traditës. Për ta, fshatrat kanë nevojë për më shumë gjallëri, ndaj është e rëndësishme organizimi i sa më shumë koncerteve të tilla

Përfaqësues të grupeve të polifonisë labe që morën pjesë shprehen tepër të lumtur. Ata thonë se qëllimi është ta trashëgojnë polifoninë labe tek brezat e ardhshëm.

Festivali folklorik i Kotës çel edhe një tjetër traditë në zonë, atë të festave të fshatrave, ku në çdo qendër të fshatrave në zonë do të ketë festa me këngë dhe valle.