Filipçe: Mickoski është “idiot i plotë” që e izolon vendin nga BE-ja

Lideri i opozitës Venko Filipçe e quajti sot kryeministrin Hristijan Mickoski “idiot të plotë” gjatë një konference shtypi në Kuvend, të mbajtur së bashku me grupin parlamentar të SDSM-së dhe koalicionin, në prag të vizitës së presidentes së Komisionit Evropian Ursula von der Leyen, siç njofton portali Fokus.

“Pas më shumë se 30 vjetësh jemi në një qorsokak për Evropën, sipas dëshirës personale të Hristijan Mickoskit. Ka një udhërrëfyes të qartë për katër vende: deri në vitin 2030, anëtare të BE-së do të bëhen Shqipëria, Mali i Zi, Ukraina dhe Moldavia. Ne nuk jemi aty,” tha Filipçe.

Ai kritikoi pretendimet patriotike të kryeministrit, duke theksuar se emri, gjuha, kultura dhe identiteti janë të ruajtura në marrëveshjet ndërkombëtare, dhe ironizoi deklaratat e Mickoskit se Islanda nuk dëshiron në BE: “Islanda është pjesë e tregut të përbashkët. A mund të jetë njeriu një idiot kaq i plotë, që na izolon plotësisht?”

Deklarata e Filipçes vjen pasi u bë e ditur se Brukseli po përgatit udhërrëfyes të rinj zgjerimi për katër vende, pa Maqedoninë e Veriut — një lajm që nxiti reagimin e ashpër të opozitës.