Finalizohet projekti EU4SAFEALB, 6 milionë euro për Policinë e Kufirit dhe Migracionit

Sot në Dhërmi, me praninë e ministrit të Brendshëm, Bledi Çuçi dhe drejtorit të Policisë, Muhamet Rrumbullaku, u finalizua me sukses EU4SAFEALB, një projekt ndihme prej 6 milionë eurosh për Policinë e Kufirit dhe Migracionit të Shqipërisë, e cila tani ka në dispozicion 5 mjete patrullimi të tjera, 2 kulla radari të reja dhe 15 mjete vëzhgimi, njoftoi Delegacioni i BE në Tiranë.

Nëpërmjet EU4SAFELAB, BE-ja u dhuroi autoriteteve shqiptare pajisje moderne dhe trajnime të specializuara. Kjo mbështetje do të sigurojë kontroll dhe mbikëqyrje efektive kufitare, për të luftuar trafikun e narkotikëve dhe parandalimin e migrimit të paligjshëm.

Gjatë aktivitetit, ambasadorja e BE-së në Tiranë, Christiane Hohmann dhe të ftuarit e tjerë dëshmuan përmasat e ndihmës së ofruar, duke marrë pjesë në një sërë ushtrimesh të simuluara, të kryera me sukses nga policia kufitare shqiptare.

“Është gjithmonë e mrekullueshme të jesh në Dhërmi, veçanërisht sot kur shënuam bashkëpunimin e ngushtë mes BE-së dhe Shqipërisë në luftën kundër krimit të organizuar. Kemi bindjen se autoritetet kufitare shqiptare do të sigurojnë impaktin e pajisjeve të dhuruara, përmes burimeve të mjaftueshme njerëzore dhe materiale”, tha ambasadorja e BE-së, Christiane Hohmann.