Fituesi i Çmimit Nobel për Paqen: Putini nuk mund të pretendojë fitoren në Ukrainë

Fituesi i Çmimit Nobel për Paqen, gazetari rus Dmitry Muratov, thotë se Vladimir Putin nuk mund ta konsiderojë më luftën në Ukrainë si një fitore, pavarësisht mënyrës se si do të përfundojë konflikti.

Muratov, i njohur për mbrojtjen e lirisë së shprehjes, kritikoi ashpër shtypjen e mediave dhe disidentëve në Rusi. Ai tha se të paktën 1,500 persona janë burgosur pasi kanë folur kundër politikës së Kremlinit, sipas vlerësimit të tij.

Gazetari theksoi se lufta, e cila fillimisht u paraqit nga Moska si një operacion i shkurtër, është shndërruar në një nga konfliktet më të përgjakshme në Evropë që nga Lufta e Dytë Botërore.

“Kur dy kombe sllave kanë copëtuar një milion njerëz ose më shumë, kjo nuk mund të quhet fitore. Të gjithë ata ekspertë politikë që thonë ‘Putini mendon kështu’ ose ‘Putini ka frikë nga ajo’… janë të gjithë sharlatanë. Është në të njëjtën kategori me astrologjinë. Askush nuk e di se çfarë po ndodh në kokën e Vladimir Putinit. Dhe unë nuk e di”, tha Muratov.

“Unë i shoh gjërat vetëm si gazetar. Unë studioj të dhëna të mëdha. Dhe që nga fillimi i vitit, nevoja për të përdorur armë bërthamore është përmendur më shumë se 500 herë. Kur budallenjtë e thonë këtë, unë nuk i kushtoj vëmendje. Por e kam dëgjuar të diskutohet në televizionin shtetëror. Dhe në Forumin Ekonomik Ndërkombëtar të Shën Petersburgut, një aktivitet i organizuar nga shteti, një nga folësit foli për përdorimin e armëve bërthamore si diçka të favorshme, diçka të mirë.

Kur njoftoi pushtimin masiv të Ukrainës në shkurt të vitit 2022, Presidenti Putin foli për “garantimin e sigurisë së Rusisë”.

Më thuaj, a është rritur siguria? Me dronët ukrainas që tani sulmojnë depot e shitësit më të madh online në Rusi Wildberries; me krizën e benzinës, ndërprerjen e internetit në celular, të burgosurit politikë? A është rritur siguria apo jo?”, pyet Muratov .

Pavarësisht sondazheve të opinionit që regjistrojnë një rënie të vlerësimeve të miratimit të Vladimir Putinit në vend, Muratov beson se presidenti i Rusisë e mban pushtetin nën kontroll të fortë.

“Më vjen keq, nuk i besoj të gjitha këtyre bisedave për një përçarje midis anëtarëve të elitës, për komplote të fshehta. Vendi drejtohet nga Vladimir Putin. Ata kanë frikë prej tij. Dhe kjo frikë përforcohet në çdo mënyrë nga baza e tij kryesore e mbështetjes: Shërbimi Federal i Sigurisë (FSB).

Sado kritik që është ndaj qeverisë së tij, ai ka pak iluzione për Perëndimin.

Putini e di shumë mirë vlerën e vërtetë të udhëheqësve evropianë. Nga njëra anë, ata i flasin për të drejtat e njeriut. Ai qesh me të madhe sepse, me dorën tjetër, ata nënshkruajnë marrëveshje – ose më parë nënshkruanin marrëveshje – me Rusinë për tregtinë e naftës, gazit, diamanteve… të gjitha këto gjëra. Kur ata flasin me Putinin për vlerat evropiane, ai qesh me të vërtetë me të madhe. Ai e di vlerën e vërtetë të njerëzve që ia predikuan ato vlera”, shpjegon Dmitry Muratov.

“Ajo që më shqetëson më shumë tani është se askush në botë nuk është i interesuar për të burgosurit politikë që ishin të parët që folën kundër grabitjes së tokës në vendin tonë fqinj”, perfundon ai.