Flick përshëndet Lewandowskin: Do të na mungojë të gjithëve, e vështirë ta zëvendësojmë

Hansi Flick shijoi fitoren 3-1 të Barcelonës ndaj Betis, por e diela në mbrëmje ishte mbi të gjitha një peshë emocionale për lamtumirën e Lewandowski nga publiku blaugrana. Trajneri gjerman e vlerësoi shumë sulmuesin polak: “Ishte një lamtumirë e mrekullueshme, shumë emocionale. U pa qartë sa shumë e ka Robert në zemër Barcelonën. Përveçse lojtar i nivelit botëror, është një njeri fantastik dhe do të ketë gjithmonë mirënjohjen time”.

Flick pranoi se zëvendësimi i tij do të jetë shumë i vështirë: “Në 20 vitet e fundit ka qenë numri 9 më i mirë në botë. Të gjesh një zëvendësues për të nuk është e lehtë. Na duhet një sulmues që luan me skuadrën, por mbi të gjitha që shënon gola”. Ai shtoi se skuadra ka cilësi për të ardhmen: “Sezonin e ardhshëm do të kemi mjaftueshëm cilësi për të luftuar për të gjitha objektivat”.

Flick vlerësoi edhe lidhjen e klubit me qytetin: “Barcelona është klubi më i mirë në botë. Këtu ndjen besim, ka lidhje të jashtëzakonshme me tifozët dhe njerëzit e qytetit”. Në fund, ai riktheu edhe një herë vëmendjen te Lewandowski: “Na ka dhuruar momente të pabesueshme, gola dhe trofe. Do t’iu mungojë të gjithëve”.