Fluks vizitorësh në Kalanë e Lezhës edhe gjatë shtatorit

Edhe në mes të shtatorit, monumentet e trashëgimisë kulturore në vend vijojnë të jenë pjesë e itinerareve të vizitorëve vendas dhe të huaj.

Mes tyre, Kalaja e Lezhës mbetet një nga pikat më të vizituara të qytetit të Lezhës, duke ofruar një kombinim të historisë, arkeologjisë dhe peizazhit. Sipas Drejtorisë Rajonale të Trashëgimisë Kulturore Shkodër, vizitorë të shumtë mbërrijnë çdo ditë në kala, ku gjurmët e periudhave të ndryshme historike ndërthuren me panoramën e qytetit dhe të Adriatikut.

Kalaja ngrihet mbi kodrën e qytetit të Lezhës, në një pozicion strategjik që ka pasur rëndësi të veçantë ndër shekuj. Historia e saj lidhet me periudha të ndryshme, nga antikiteti deri në Mesjetë dhe periudhën osmane.

Zona e kalasë ndodhet mbi Akrolisin e lashtë, qytetin antik që lidhej me zhvillimin e hershëm të Lezhës. Muret dhe gjurmët arkeologjike dëshmojnë për ndryshimet që ka pësuar fortifikimi në periudha të ndryshme. Në hapësirën e kalasë dhe rreth saj ruhen gjurmë të ndërhyrjeve dhe rindërtimeve të ndryshme, duke e bërë monumentin një dëshmi të drejtpërdrejtë të historisë së gjatë të qytetit.

Përtej vlerave historike dhe arkeologjike, Kalaja e Lezhës tërheq vizitorët edhe për panoramën që ofron mbi qytetin, fushën e Zadrimës dhe drejt Adriatikut. Ky kombinim i trashëgimisë dhe peizazhit e kthen vizitën në kala në një përvojë ku historia ndërthuret me natyrën.