FOKUS – Gjermania: Ndalimi i zhvillimit të inteligjencës artificiale nuk është zgjidhje

– Gjermania nuk e konsideron ndalimin e zhvillimit të inteligjencës artificiale (IA) një zgjidhje të zbatueshme për Evropën, deklaroi sot Ministria e Çështjeve Digjitale, në përgjigje të thirrjeve nga zhvilluesit kryesorë për masa mbrojtëse ndaj sistemeve gjithnjë e më të fuqishme, sipas Reuters.

“Ne nuk e konsiderojmë ndalimin e zhvillimit një mundësi të zbatueshme për Evropën“, tha një zëdhënës i ministrisë. Ai shtoi se forcimi i sovranitetit digjital të Evropës kërkon zhvillim dhe inovacion të mëtejshëm në fushën e inteligjencës artificiale.

Deklaratat e Berlinit erdhën pasi drejtori ekzekutiv i kompanisë “Anthropic”, Dario Amodei, publikoi gjatë fundjavës një ese ku u bëri thirrje kompanive të IA-së të ngadalësojnë ritmin e përmirësimit të aftësive të modeleve të tyre.

Ai propozoi gjithashtu masa më të forta sigurie, përfshirë vendosjen e vlerësuesve të pavarur brenda kompanive të teknologjisë.

Ministria gjermane deklaroi se po monitoron nga afër zhvillimet globale të inteligjencës artificiale dhe se i merr seriozisht paralajmërimet publike të zhvilluesve kryesorë të kësaj teknologjie.

Megjithatë, zëdhënësi theksoi se sistemet e IA-së që do të ishin në gjendje të dilnin nga mjediset e testimit dhe të hynin vetë në sisteme të tjera do të përbënin “një skenar krejtësisht të ri kërcënimi“.

Sipas tij, një zhvillim i tillë do të kërkonte një përgjigje të re nga politikat publike.

Zëdhënësi mbështeti gjithashtu bashkëpunimin ndërkombëtar për qeverisjen e inteligjencës artificiale. Ai tha se mbikëqyrja efektive e kësaj teknologjie do të kërkonte përfshirjen e Shteteve të Bashkuara dhe Kinës.

“Qeveria gjermane po e ngre këtë çështje në nivelin e G7-s”, shtoi zëdhënësi i ministrisë.