Moment tensioni te Kryeministria: protestuesit tentojnë të çajnë kordonin, policia përgjigjet me spraj me piper

Një moment i ri tensioni u regjistrua pasditen e sotme përpara Kryeministrisë, ku protestuesit tentuan të çajnë kordonin e policisë që rrethonte godinën qeveritare.

Siç njofton BalkanWeb, efektivët u përgjigjën me spraj me piper për të ndalur përpjekjen e turmës, ndërsa situata për disa minuta mbeti e tensionuar përballë kordonit të forcave të rendit.

Pas ndërhyrjes, protestuesit debatuan për disa minuta me efektivët e policisë. Ata kërkuan që spreji me piper të mos përdorej ndaj vajzave të pranishme në protestë, duke theksuar se protesta është një e drejtë e tyre.

Gjatë debatit, protestuesit përsëritën edhe kërkesën për largimin e kryeministrit Edi Rama, kërkesë që shoqëron prej ditësh tubimet e studentëve dhe protestën kombëtare të thirrur në mbështetje të tyre.

Episodi i sotëm vjen pas një dite me tensione të përsëritura në kryeqytet, ku më herët policia kishte përdorur ujë me presion dhe gaz lotsjellës për shpërndarjen e protestuesve, ndërsa në rrugët e Tiranës u raportua edhe për hedhje molotovësh drejt një autoblindë të policisë.