FOKUS – Italia kërkon pezullimin e Spanjës nga zona Schengen, pas valës së emigrantëve në Ceuta

ROMË, 30 korrik /ATSH-AFP/ –  Ministri i Jashtëm i Italisë, Antonio Tajani, deklaroi sot se mbështet pezullimin e Spanjës nga zona Schengen, pasi qindra emigrantë mbërritën në mënyrë të paligjshme në enklavën spanjolle të Ceutës nga Maroku.

Në një postim në rrjetin social X, Tajani tha se është “pro mbylljes së hapësirës Schengen me Spanjën”, duke akuzuar Madridin se po nxit emigracionin e parregullt dhe të pakontrolluar.

Sipas tij, pamjet nga Ceuta tregojnë se vendimi i qeverisë spanjolle për t’u dhënë shtetësi spanjolle, dhe rrjedhimisht shtetësi evropiane, më shumë se 500 mijë emigrantëve të parregullt, krijon një efekt tërheqës dhe inkurajon trafikimin e qenieve njerëzore.

Tajani, i cili është edhe zëvendëskryeministër dhe anëtar i partisë konservatore “Forza Italia”, aleate në koalicionin e kryeministres Giorgia Meloni, kërkoi masa më të ashpra për mbrojtjen e kufijve të Bashkimit Evropian.

Edhe zëvendëskryeministri tjetër italian, Matteo Salvini, lider i partisë së djathtë “Liga”, bëri thirrje për pezullimin e marrëveshjes Schengen dhe forcimin e mbrojtjes së kufijve të Evropës.

Megjithatë, pezullimi i një shteti nga zona Schengen nuk mund të vendoset në mënyrë të njëanshme nga Italia.

Një masë e tillë do të kërkonte procedura dhe vendimmarrje në nivel të Bashkimit Evropian. /Ad.Ab./  a.jor.