FOKUS – Martin: Komunitetin ndërkombëtar ka dështuar ndaj popullit palestinez

DUBLIN, 25 shtator /ATSH -AA/ – Kryeministri iirlandez, Micheal Martin, deklaroi se komuniteti ndërkombëtar ka dështuar ndaj popullit palestinez, duke paralajmëruar se dhuna e vazhdueshme, kufizimet ndaj ndihmave humanitare dhe zgjerimi i vendbanimeve po dëmtojnë perspektivat për një paqe të qëndrueshme.

Duke folur në Asamblenë e Përgjithshme të OKB-së në New York, Martin tha se rendi juridik ndërkombëtar po përballej me “presion të jashtëzakonshëm”, duke shtuar se mohimi i të drejtave themelore të miliona njerëzve në mbarë botën mbetet një nga sfidat kryesore të kohës sonë.

Ai tha se faza e parë e planit të paqes për Gazën, për të cilin Izraeli dhe Hamasi ranë dakord tetorin e kaluar, ishte e mirëpritur, por nuk kishte ndryshuar në thelb situatën në terren, duke iu referuar sulmeve të vazhdueshme izraelite, kufizimeve ndaj ndihmave humanitare dhe vuajtjeve të civilëve.

“Ne, komuniteti ndërkombëtar në tërësi, kemi dështuar ndaj Palestinës”, tha Martin, duke iu referuar vuajtjeve të vazhdueshme të civilëve në Gaza dhe Bregun Perëndimor të pushtuar.

Ai dënoi zgjerimin e vendbanimeve të paligjshme izraelite në Bregun Perëndimor të pushtuar, duke thënë se këto zhvillime po dëmtojnë perspektivat për një paqe të drejtë dhe të qëndrueshme.

“Jemi dëshmitarë të një përpjekjeje të qëllimshme nga disa për ta bërë të pamundur perspektivën e një zgjidhjeje me dy shtete. Kjo nuk është ndonjë teori konspirative. Ky është qëllimi i deklaruar i kryeministrit të Izraelit, Benjamin Netanyahu”, tha Martin.

Ai iu referua deklaratave të atribuuara Netanyahut kundër krijimit të një shteti palestinez, si dhe miratimit nga Izraeli të zhvillimeve në zonën E1 të Bregut Perëndimor të pushtuar.

Martin rikonfirmoi gjithashtu mbështetjen e Irlandës për Gjykatën Penale Ndërkombëtare, duke thënë se “nuk mund të ketë pandëshkueshmëri për krimet e luftës”, dhe bëri thirrje për tërheqjen e masave që synojnë minimin e gjykatës.