FOKUS – Met Office: Ky El Nino mund të jetë më intensivi në më shumë se një shekull

LONDËR, 21 gusht /ATSH-AFP/ – Fenomeni klimatik El Nino pritet të jetë më intensivi i vërejtur ndonjëherë në më shumë se një shekull, paralajmëroi një ekspert i lartë nga Zyra Meteorologjike e Mbretërisë së Bashkuar (Met Office), duke konfirmuar parashikimet nga shumica e ekspertëve.

El Nino është një fenomen natyror i përkohshëm, i amplifikuar nga ngrohja globale e shkaktuar nga njeriu, që ndodh çdo dy deri në shtatë vjet.

Ai rezulton në mot më të ngrohtë dhe më të thatë në disa zona dhe mot më të freskët dhe më të lagësht në të tjera, duke çuar në ngjarje ekstreme të motit.

“Nuk kam parë kurrë një fenomen të tillë në parashikimet tona… presim ngjarjen më intensive të El Ninos në më shumë se një shekull, me një kulm që tejkalon tre gradë Celsius (në temperaturën e sipërfaqes së detit në një zonë referimi të Paqësorit), gjë që është e pashembullt në të dhënat moderne të klimës”, tha për BBC-në Adam Scaife, kreu i parashikimit afatgjatë në Zyrën Meteorologjike të Mbretërisë së Bashkuar.

Ai theksoi se pasojat do të jenë veçanërisht të rënda rreth tropikëve, me thatësira drastike në Amerikën e Jugut dhe Paqësorin perëndimor, por se ndërprerjet do të ndihen deri në Mbretërinë e Bashkuar.

”Ne tashmë po shohim shenja të rritjes së reshjeve dhe stuhive këtu në Mbretërinë e Bashkuar, rreth nëntorit, si dhe në të gjithë Evropën veriperëndimore”, shtoi eksperti.

Sipas parashikimeve nga Zyra Meteorologjike dhe ekspertë të tjerë, madhësia e fenomenit El Nino mund ta bëjë vitin 2027 vitin më të nxehtë të regjistruar ndonjëherë, me ndikimin e tij që ndihet kryesisht në vitin pas ndodhjes së tij./ a.jor.