FOKUS – Pijet me sheqer nën vëzhgim: fruktoza mund të nxisë përhapjen e tumorit

– Lajme jo shumë inkurajuese për adhuruesit e fruktozës. Një studim i Institutit Wistar, i publikuar në revistën Nature Aging, ka zbuluar një lidhje të papritur mes këtij sheqeri dhe përhapjes së një forme agresive të kancerit të vezoreve, shkruan mondosanita.it.

Studimi tregon se disa qeliza tumorale që mbijetojnë pas kimioterapisë, edhe pse nuk ndahen më, mbeten metabolikisht aktive dhe dërgojnë sinjale te qelizat kancerogjene përreth, duke favorizuar përhapjen e tyre. Fruktoza rezultoi të jetë një nga sinjalet kryesore në këtë mekanizëm.

“Disa qeliza tumorale që mbijetojnë kimioterapisë nuk ndahen më, por mbeten biologjikisht aktive”, deklaroi Aidan Cole, studiues postdoktoral në laboratorin e Katherine Aird në Institutin Wistar dhe autori i parë i studimit.

“Në vend të kësaj, ato vazhdojnë të çlirojnë molekula që dërgojnë sinjale te qelizat fqinje. Studimi ynë është ndër të parët që tregon se një lëndë ushqyese, në këtë rast fruktoza, mund të veprojë si një prej këtyre sinjaleve”, shtoi ai.

Karcinoma e vezoreve trajtohet pothuajse gjithmonë me kimioterapi të bazuar në përbërje të platinit dhe shumë paciente reagojnë mirë fillimisht.

Megjithatë, në shumicën e rasteve sëmundja rikthehet dhe, pothuajse gjithmonë, përhapet në zgavrën e barkut. Kjo metastazë është përgjegjëse për rreth 90% të vdekjeve të lidhura me këtë sëmundje.

Studimet e mëparshme kishin sugjeruar se qelizat tumorale që nuk eliminohen nga trajtimi mund të kontribuojnë në rikthimin e sëmundjes.

Për këtë arsye, Cole dhe kolegët e tij zhvilluan një eksperiment të posaçëm: ata mblodhën molekulat e sekretuara nga qelizat që kishin mbijetuar ndaj barnave dhe treguan se këta faktorë, edhe të vetëm, ishin në gjendje të rrisnin ndjeshëm aftësinë e qelizave tumorale për t’u përhapur.

“Me sa dimë, kjo është hera e parë që dikush demonstron, në një model paraklinik dhe jo vetëm në kulturë qelizore, se janë molekulat e çliruara nga këto qeliza, dhe jo vetë qelizat, ato që nxisin përhapjen e tumorit”, theksoi Cole.

Duke e analizuar më tej mekanizmin, ekipi identifikoi fruktozën si një nga sinjalet kryesore të prodhuara nga këto qeliza dhe të transmetuara te qelizat e tjera.

Jo vetëm kaq: studiuesit vunë re se, edhe në mungesë të kimioterapisë, konsumimi i lartë i fruktozës përmes pijeve me sheqer mund të veprojë si një sinjal i ngjashëm.

Zbulimi është veçanërisht i rëndësishëm sepse hap mundësinë që ndërhyrjet e synuara në dietë të ndikojnë në përparimin e sëmundjes.

Megjithëse efektiviteti i kufizimit të fruktozës nuk është testuar ende drejtpërdrejt te pacientet, studimi sugjeron se dieta mund të ndikojë në ecurinë e tumorit në mënyra që deri tani nuk janë eksploruar sa duhet.

Grupi i studiuesve po punon për të kuptuar më mirë mekanizmin dhe për të parë nëse ky fenomen shtrihet edhe përtej kancerit të vezoreve.

“Ne mendojmë se tumore të tjera – si ato të pankreasit, zorrës së trashë dhe mëlçisë – mund të sillen në mënyrë të ngjashme. Ende nuk mund ta konsiderojmë këtë një fenomen universal, por mendojmë se efektet nuk kufizohen vetëm te kanceri i vezoreve”, tha Aird.

E rëndësishme: studimi nuk provon se fruktoza shkakton kancer ose se ndalimi i saj e trajton kancerin.

Bëhet fjalë për një mekanizëm të vërejtur në modele paraklinike, ndaj nevojiten studime te njerëzit për të përcaktuar nëse ulja e konsumit të fruktozës ndikon realisht në rikthimin ose përhapjen e tumorit