FOKUS – Polonia synon pritjen e 15 mijë trupave amerikane

VARSHAVË, 21 shtator /ATSH-AFP/ – Polonia synon të rrisë praninë e trupave amerikane në territorin e saj me rreth 15 mijë ushtarë, deklaroi zëvendësministri polak i Mbrojtjes, Stanislaw Wziatek, në një intervistë për RMF FM.

“Po flasim për një objektiv prej 15 mijë ushtarësh”, tha Wziatek, duke sqaruar se kontingjenti do të përfshinte rreth 10 mijë trupa në rotacion dhe 3 500 deri në 5 000 ushtarë të stacionuar në mënyrë të përhershme.

Aktualisht, në Poloni ndodhen rreth 6 500 deri në 7 000 ushtarë amerikanë në rotacion, sipas zëvendësministrit.

Presidenti amerikan Donald Trump deklaroi javën e kaluar se kishte “përparime të mëdha” drejt krijimit të një baze të përhershme ushtarake amerikane në Poloni, ndërsa administrata amerikane po rishikon praninë ushtarake të Shteteve të Bashkuara në Evropë.

Sipas Wziatek, rritja e pranisë amerikane do të realizohet gradualisht deri në vitin 2039.

Polonia, anëtare e NATO-s dhe e Bashkimit Evropian, ndodhet në krahun lindor të Aleancës dhe ka rritur ndjeshëm shpenzimet për mbrojtjen pas nisjes së luftës së Rusisë në Ukrainë.

Kryeministri polak Donald Tusk ka paralajmëruar së fundmi për kërcënime “hibride” nga Rusia, përfshirë incidente me dronë dhe raketa, ndërsa Varshava e ka akuzuar Moskën në disa raste për akte sabotimi që prej vitit 2022.

Polonia është ndër vendet e NATO-s që shpenzojnë pjesën më të madhe të Prodhimit të Brendshëm Bruto për mbrojtjen, me rreth 5% të PBB-së./ a.jor.