FOKUS – Rusia e hapur për takim Putin-Trump-Xi në samitin e APEC në Kinë

– Rusia është e hapur për mundësinë e zhvillimit të një takimi tripalësh mes presidentit rus Vladimir Putin, presidentit amerikan Donald Trump dhe presidentit kinez Xi Jinping gjatë samitit të APEC-ut në Kinë, ndërsa ende nuk ka një marrëveshje konkrete për organizimin e tij, raportoi “Reuters”.

Këshilltari i Kremlinit për politikën e jashtme, Yuri Ushakov deklaroi se mundësia e një takimi mes tre liderëve është diskutuar.

Sipas tij, nëse Trump merr pjesë në samit, presidenti kinez, Xi Jinping mund të ndërmarrë hapa për të organizuar një takim të përbashkët.

Samiti i liderëve të Bashkëpunimit Ekonomik Azi-Paqësor (APEC) do të zhvillohet më 18 dhe 19 nëntor në Shenzhen, në jug të Kinës. Kina është vendi pritës i APEC-ut për vitin 2026.

Mundësia e një takimi Putin-Trump-Xi ishte diskutuar fillimisht në fillim të shtatorit.

Atëherë Ushakov tha se Putini dhe Xi-ja e kishin diskutuar çështjen gjatë takimit të tyre në kuadër të samitit të Organizatës së Bashkëpunimit të Shangait në Bishkek.

Ai deklaroi se, nëse gjithçka do të shkonte sipas planit, një takim i tre liderëve mund të organizohej gjatë APEC-ut.

Më 29 shtator, Ushakov e riktheu këtë mundësi, duke thënë se nëse Trump do të ishte i pranishëm në samit, do të ishte e mundur që Xi të ndërmerrte hapa për një takim tripalësh. Ai theksoi se nuk kishte ende një marrëveshje për një takim të tillë.

Ndërkohë, pjesëmarrja e Trump në APEC është bërë më konkrete.

Shtëpia e Bardhë deklaroi se SHBA-ja dhe Kina, do të mbështesin njëra-tjetrën si vende pritëse të samiteve të G20-ës dhe APEC-ut dhe se Trump dhe Xi synojnë të marrin pjesë në samitet përkatëse.

Një takim i veçantë mes Putinit dhe Xi Jinping pritet gjithashtu të zhvillohet në kuadër të samitit të APEC-ut.

Putini ka shprehur optimizëm për takimin me homologun kinez dhe ka thënë se ai mund të forcojë më tej marrëdhëniet mes Rusisë dhe Kinës.

Megjithatë, një takim Putin-Trump-Xi nuk është konfirmuar ende. Nuk janë përcaktuar as formati, agjenda apo çështjet që do të diskutohen nëse takimi realizohet.

Një takim i tillë do të ishte i rëndësishëm në aspektin diplomatik, pasi do të sillte në të njëjtën tryezë liderët e Rusisë, SHBA-së dhe Kinës, tre prej fuqive kryesore që marrin pjesë në APEC. /