FOKUS – Ukraina godet cisternat e “flotës hije” ruse që furnizojnë Krimenë

– Dronët ukrainas kanë sulmuar rreth një duzinë cisternash të “flotës hije” ruse gjatë dy ditëve të fundit, të cilat transportonin karburant drejt Krimesë, njoftoi sot ushtria ukrainase, sipas “Reuters”.

Forcat ukrainase të dronëve thanë se kishin goditur disa anije në Detin e Azovit, të përdorura për furnizimin me karburant të gadishullit të pushtuar nga Rusia.

Sipas tyre, sulmet synojnë të dobësojnë rrjetin logjistik të Moskës në Krime, një zonë me rëndësi strategjike për operacionet ushtarake ruse.

Sulmet pasuan goditje të tjera ndaj anijeve të “flotës hije”, në të njëjtën zonë një ditë më parë.

Ukraina ka intensifikuar kohët e fundit, sulmet ndaj infrastrukturës energjetike dhe logjistike në Krime, duke shkaktuar probleme me furnizimin me karburant dhe duke detyruar autoritetet lokale të shpallin gjendjen e emergjencës.

Kievi tha se goditja e logjistikës detare ruse, vështirëson furnizimin me karburant dhe municione për trupat e Moskës, në territoret e pushtuara.

“Flota hije” është një term që përdoret për rrjetin e anijeve të përdorura nga Rusia për të transportuar naftë dhe produkte energjetike, shpesh duke shmangur kufizimet dhe sanksionet ndërkombëtare.

Rusia nuk ka komentuar publikisht për sulmet e fundit.

Ukraina, më herët ka përdorur dronë detarë dhe ajrorë për të goditur objektiva ruse në Detin e Zi dhe në zonat përreth Krimesë, si pjesë e përpjekjeve për të kufizuar aftësitë logjistike dhe financiare të Moskës. /