Fortenova mbyll zyrtarisht shitjen: Idea, Mercator dhe Roda në Serbi kalojnë te Alta Retail

Procesi i shitjes së bizneseve të pakicës të Fortenova grupit në Serbi u mbyll formalisht, pasi u përmbushën të gjitha kushtet e përcaktuara në dokumentacionin e shitjes, siç njofton SeeNews. Me përmbylljen e transaksionit, kompania Alta Retail fitoi pjesët e biznesit në Idea marketi d.o.o. dhe në katër shoqëri të tjera të grupit, veprimtaria e të cilave lidhet me shitjen me pakicë në Serbi.

Sipas njoftimit të Fortenova grupit, të cilin e përcjell revista kroate e tregtisë Progressive, pjesë e marrëveshjes janë edhe Enna Fruit Grocka e Beogradit, furnizuese e frutave dhe perimeve, Super kartica e Beogradit, që menaxhon programin e besnikërisë, M-Profil SPV e Beogradit, e angazhuar me pasuri të paluajtshme, dhe mStart Business Solutions e Beogradit, që ofron zgjidhje në fushën e teknologjisë së informacionit. Të gjitha këto kompani tashmë bëhen pjesë e Alta Retail-it.

Me hyrjen në sektorin e pakicës, Alta Group bën një hap të rëndësishëm në diversifikimin e mëtejshëm të biznesit të saj, duke investuar në kompani me pozita të forta në treg, brende të njohura dhe potencial të konsiderueshëm zhvillimi. Sipas njoftimit, synimi i pronarit të ri është t’u hapë kompanive një kapitull të ri rritjeje përmes modernizimit, përmirësimit të proceseve dhe inovacioneve, me respekt të plotë për identitetin dhe traditën që brendet Idea, Mercator dhe Roda e kanë ndërtuar prej vitesh në tregun serb.

Marrëveshja e shitjes ishte nënshkruar në shtator, kur Fortenova e arsyetoi daljen nga Serbia me strategjinë për t’u përqendruar në tregjet ku mban pozita udhëheqëse. Përmes Idea marketeve, grupi kroat operonte brendet Idea, Mercator dhe Roda në më shumë se 80 qytete e qyteza të Serbisë, duke qenë një nga zinxhirët më të mëdhenj të pakicës në vend dhe një nga dhjetë punëdhënësit më të mëdhenj.