Forumi për Dialogun Politik: Po punojmë për një marrëveshje të partive të opozitës për kodin e ri zgjedhor

Forumi për Dialogun Politik ka deklaruar këtë të marte se po punon për një marrëveshje të partive të opozitës për një qëndrim të unifikuar për kodin e ri

Forumi për Dialogun Politik ka deklaruar këtë të marte se po punon për një marrëveshje të partive të opozitës për një qëndrim të unifikuar për kodin e ri zgjedhor. Sipas forumit gjatë javëve të shkuara kanë biseduar me drejtuesit e partive kryesore dhe kanë arritur një marrëveshje në parim.

Sistemi proporcional kombëtar me lista të hapura dhe koalicione parazgjedhore është propozuar nga vetë Forumi dhe dy parti opozitare. Partia Demokratike ka pranuar propozimin. Aktualisht po punohet për detajet konkrete.

Forumi mendon se një sistem i tillë zgjedhor do të garantojë një përfaqësim më të drejtë të shqiptarëve, do të mundësojë garë më të ndershme dhe deputetë më përfaqësues. Ky sistem mundëson gjithashtu një përfaqësim më të drejtë të partive të reja opozitare.

Forumi vlerëson lart qëndrimin konstruktiv të partive opozitare. Ky është një hap i rëndësishëm pozitiv për një opozitë më të fortë e të besueshme.